Pader Paul Tobler ha giu primizia a Mustér

(anr/gc) L’ordinaziun d’in spiritual e sia emprema messa, numnada era primizia u messa nuviala, ei in mument zun impressiunont per il pertuccau, sia cuminonza claustrala ed era pil pievel cartent. Quei ei semussau era venderdis vargau a caschun dall’ordinaziun e sonda tier la primizia da pader Paul Tobler ella baselgia parochiala S. Gions a Mustér. In grond pievel ha assistiu.

L’ordinaziun sacerdotala tras igl uestg diocesan, msgr. Vitus Huonder, ei sesplegada el rom d’ina ceremonia festiva en treis parts: Survetsch divin dil plaid, ordinaziun dil candidat tras igl uestg cun imponer ils mauns e l’eucaristia concelebrada era cul gest ordinau spiritual. L’entira liturgia ei vegnida enramada dil bi cant dil Chor dalla scola claustrala sco era da canzuns, oraziuns e supplicas.

L’ordinaziun – ceremonia 
e ritus impressiunont

Uestg Vitus ei vegnius beneventaus cordialmein dad avat Vigeli Monn. All’entschatta da siu priedi ha msgr. uestg Vitus detg ch’el hagi ordinau en ses 11 onns d’uffeci 60 spirituals – 40 da quels pigl uestgiu e 20 per diversas communitads religiusas. L’ordinaziun da pader Paul astgass esser ina da sias davosas cunquei ch’il temps d’uffeci scada per uestg Vitus l’auter onn da Pastgas.

En sia homilia ha uestg Vitus detg che l’ordinaziun seigi in sacrament e nunrenunziabla per la baselgia. Cristus ha giu dau als apostels tier la s. Tscheina la pussonza da celebrar ils sogns misteris, e quei en sia memoria. Il plaid clericher munti perquei ch’il spiritual prendi part dalla sort dil Segner tochen alla crusch cun purtar mintgamai la sontg’unfrenda.

L’ordinaziun dil spiritual vegn introducida cun invocar il s. Spért e tut ils sogns. Sin la damonda digl uestg, schebein il candidat seigi digns da retscheiver l’ordinaziun, rispunda pader decan Bruno Rieder che quei seigi il cass suenter liunga examinaziun. Lu suondan las empermischuns tras il candidat visavi la baselgia e ses representants.

Sin quei impona uestg Vitus ils mauns sil tgau digl ordinand. Igl ei in sempel segn – dapi il temps dils apostels – per dar vinavon igl uffeci sacerdotal. Il medem fan era tuts spirituals presents. Cun l’oraziun suandonta vegn l’ordinaziun sco tala terminada. Sin quei survegn igl ordinau stola e plauna per saver celebrar la s. Messa. Ei suondan: uncziun dils mauns, la surdada da paun e vin e l’embratschada dil niev spiritual. Suenter l’ordinaziun vegn la messa cuntinuada e concelebrada era dil niev spiritual pader Paul. Cun il «Te Deum» en romontsch, tudestg e talian e la benedicziun primiziala va il tschaffont survetsch divin d’ordinaziun a fin.

Messa nuviala 
claustrala

All’entschatta dalla messa nuviala da pader Paul puntuescha avat Vigeli l’auter di ch’ei setracti d’ina primizia claustrala. Ella hagi denton liug ella baselgia parochiala a S. Gions perquei che la baselgia claustrala ei serrada. Ins seigi fetg engrazieivels alla pleiv da Mustér ch’hagi mess a disposiziun la parochiala persuenter. La messa nuviala hagi liug per la fiasta dall’Immaculata Concepziun da Maria che seigi vegnida eligida sco Mumma da Diu. Era pader Paul hagi detg gie alla vocaziun en survetsch da Diu.

En siu priedi ha pader decan Bruno Rieder, staus stretg accumpignader dil primiziant sin sia via da clamada e veta en claustra, era rendiu attents che Maria seigi stada exempel pil primiziant per buca ver tema da semetter alla realisaziun dil plan che Dieus hagi cun el. Sco spiritual seigi el in «alter Christus», in auter Cristus, che vegli menar surtut tras celebrar la s. Messa ils fideivels al salit.

Numerus spirituals e dabia pievel han assistiu alla sempla, mo biala messa nuviala per pader Paul. Alla fin ha il president dalla pleiv da S. Gions, Aldo Tuor, puntuau che l’ordinaziun e la messa nuviala dil niev sacerdot en baselgia parochiala S. Gions seigi stau era per la pleiv legria e honur. Al primiziant surdat el sco regurdientscha in bi maletg da Linus Flepp davart il tema: «La crusch salvonta da Jesus». Quei ha regurdau nus alla surdada dalla s. crusch antruras al primiziant avon casa paterna e lu serender en baselgia per la messa nuviala.

Engraziament e benedicziun finala

Il plaid final dil primiziant pader Paul – tenius per part era en romontsch – ei staus in grond e sincer engraziament a tut quels ch’han accumpignau e susteniu el sin la via a spiritual e conventual en survetsch da Diu. Igl ei stau ina gronda retscha da promoturs e cussegliaders silla liunga via tochen l’ordinaziun e messa nuviala.

Ida a fin ei la messa nuviala – sco usitau – cun la benedicziun primiziala. Suenter che tuts han retschiert ella ein aunc biars singuls i per ella tier il primiziant. Per biars era ed ei la benedicziun primiziala era ina culminaziun e significonta conclusiun dalla primizia.