Lucrezia Furrer 
per la davosa giada

A la radunanza communala da Favugn han ils abitants prendì cumià da Lucrezia Furrer ch’è stada dapi il 1999 en la suprastanza communala e dapi il 2010 presidenta. Er il vicepresident Roland Schmid sa retira. El è stà dapi il 2010 en suprastanza e dapi il 2016 vicepresident. Il suveran da Favugn ha approvà il preventiv per l’onn che vegn. Quel prevesa ina perdita da 260 300 francs tar investiziuns nettas dad in milliun francs. Plinavant ha il suveran dà credits en valita dad 1,3 milliuns francs. Tranter auter per sanar ina part da la via da Tumein e per il plaz da la chasa cumin. Il pe da taglia resta tar 95% da la taglia chantunala simpla.

L’actura americana Sharon Stone vegn citada a San Murezzan. Ella duai sa responsar avant l’uffizi da mediaziun, uschia èsi da leger en il fegl uffizial dal chantun Grischun. Sco quai che l’agentura da novitads SDA scriva giaja per ina pretaisa da daners envers il star da Hollywood. L’intermediatur en il cas n’ha vulì far naginas indicaziuns davart il cuntegn da la procedura dal schaner 2019, quai pervia dal secret d’uffizi. L’ultima giada aveva Stone visità San Murezzan avant in onn per in event da Charity.

Il Centro Sanitario Bregaglia surdat omaduas funcziuns – quella da directur e da manader da tgira – ad ina persuna. Entras quai duai il management dal center vegnir pli simpel. Tschernì ha il cussegl Robert Bartczak. El è tgirunz ed ha bunamain 30 onns experientscha. Plinavant è el sa scolà per manar interpresas en il sectur da sanadad. Bartczak cumenza il prim da schaner.