Documentà quai chi circulaiva sülla rait da la VR

(anr/fa) Rolling Stock es il term inglais per material rodlant. Uschea as nomna eir l’exposiziun chi vain muossada actualmaing i’l Museum da la Viafier Alvra a Bravuogn. L’exposiziun «Rolling Stock II» chi’d es gnüda drivida d’incuort muossa üna schelta dal grond archiv da fotografias da Gian Brüngger. Fingià pella seguonda jada expuona el a Bravuogn üna schelta da sias fotografias. Fin als 2 da gün 2019 pon ils interessats verer i’l Museum da Viafier Alvra quists purtrets da temps passats. Dürant ils blers ons cha Brüngger ha lavurà pro la VR ha’l documentà il svilup dal material rodlant, ils vaguns e las locomotivas da la Retica. Dad üna vart ha’l notà tuot las müdadas e da tschella fotografà impustüt i’ls ons 1970 e 1980 tuot quai chi d’eira in viadi süls binaris da la VR. Quistas fotografias documenteschan il svilup tecnic chi ha dat in quels ons pro vaguns e locomotivas. Tuot las fotografias in alb e nair.

Dvantà perit per l’istorgia 
da la Viafier retica

Il bazegner da Brüngger d’eira pro la Viafier retica (VR) guardgialingia a Spinas e seis bap d’eira suppleant schef dal depot da la Retica a Samedan. D’uffant ha Brüngger passantà bler temp sün staziun o i’l depot da la viafier. Uschè d’eira per el evidaint ch’el lavura plü tard pro la VR. Quai es eir stat il cas. Davo il giarsunadi per manar staziuns da la viafier ha el lavurà fin pro la pensiun 45 ons pella Retica. A la fin d’eira’l a Cuoira respunsabel pella planisaziun da la gestiun ed ha contribui sia part per cuntinuar a sviluppar la rait da la viafier grischuna. Davart la lingia d’Alvra ha’l scrit plüs cudeschs. El faiva eir part dal team chi ha cumpilà il dossier pella ierta mundiala da l’Unesco. Sco commember dal cussagl scientific dal Museum da la Viafier Alvra ha’l güdà a realisar quist museum a Bravuogn.

«Notizchas ill’agenda 
daspö l’on 1962»

Sco cha Gian Brüngger disch d’eiran plü bod scumpartits daplüs veiculs sülla rait da la VR co hozindi. «Minchatant tscherchaivan ils respunsabels ün veicul chi gnanca nu daiva plü.» El ha lura cumanzà al principi dals ons 1960 a far notizchas in ün’agenda. Seis bap til vaiva fat la proposta da far ün cudaschet cun tuot ils veiculs, il material rodlant da la Retica. «Hozindi lavura natüralmaing eir cul computer, ma ün cudaschet i’l format A6 n’haja istess amo adüna pro mai per notar müdamaints vi dals veiculs.» Brüngger ha notà ils detagls da tuot ils veiculs chi sun gnüts in acziun daspö l’on 1889. El ha fat üna tabella cronologica davart il material rodlant cun tuot ils detagls.

L’exposiziun «Rolling Stock II» vain muossada fin als 2 gün 2019. Il museum es avert in mardi fin venderdi e dumengia da las 09.30 fin a las 17.30 ed in sonda da las 09.30 fin cur chi’d es interess.