Situaziun dramatica u betg?

(rtr) Ils ins discurran dad ina situaziun dramatica, ils auters èn anc optimistics. La mancanza da magisters rumantschs è omnipreschenta. Surtut scolas pitschnas han difficultads da chattar magisters. Bever è perquai sa decidì per ina strategia speziala: Dapli paja ed anc in abo per il traffic public.

Bever è ina scola bilingua e cun 41 scolars e nov magisters era mo ina pitschna. Dapi il mais da zercladur èn els en tschertga da persunal e quai è ina situaziun difficila.

Il martgà dals magisters rumantschs è fitg pitschen. Perquai ha la scola da Bever era tschertgà en territori da lingua tudestga. Da chattar persunas che vulan vegnir en Engiadina ad abitar è però gnanc uschè simpel. Cun ina persuna da la Svizra tudestga na fiss il problem però betg schlià – la persuna d’instrucziun per il rumantsch mancass anc adina.

La vischnanca da Bever ha decis che mintga magister che lavura dapi che 80% survegn per mais 500 francs dapli paja. Ultra da quai è in abunament per il traffic public u per ir cun ils skis era cumprais. La strategia ha purtà fritg, ina magistra han quels da Bever pudì engaschar uschia per il nov onn da scola 2019/2020.