Melodias choralas per Nadal

(anr/ff) Nua duein ins propi semenar, sedamonda igl auditur da biala musica cantada. Tontas pusseivladads dattan els dis d’advent ad el in’elecziun. Forsa levgiescha in cuort artechel sco prevista la decisiun da tedlar ina ni l’autra producziun. Il chor mischedau Las vuschs dil Rein ha preparau ovras novas da cantar el concert da Nadal. Il special vid quellas ei che las melodias ein veglias, gie per part emblidadas ed il niev vidlunder ei ch’ellas ein tschentadas per pliras vuschs. Il dirigent dil chor e cumponist Claudio Simonet ha anflau el profund fundus dalla «Consolaziun dall’olma devoziusa» las ovras veglias ed ha arranschau ellas da niev per cantaduras e cantadurs da siu chor. Per edir l’ediziun d’antruras han sur Carli Fry e Duri Sialm rimnau las canzuns ell’entira Surselva tochen en Tumliasca. Uestg Rest Giusep Caminada ha dau ils impuls per la rimnada. El fageva quitaus ch’ei vegni cantau da tuttas sorts viars moderns sgurghiglionts e sgargnents. Tenor zitat leva el udir «las bialas vuschs naturalas da mats e mattauns el flad religius ed ord intern dall’olma enstagl splenghiem divertent».

Las melodias veglias ein musicalmein semplas. En tala mudestadad ha Simonet teniu il vestgiu da notas per cantar en quater vuschs. Il text ei da gronda muntada e las canzuns han savens diesch e dapli strofas egl original.

Per capir il cuntegn en connex cul temps da lezs onns vegn il linguist Florentin Lutz a far interessantas expectoraziuns ed explicar il context.

Ils concerts han liug: Sogn Stiafen, ils 26 da december allas 20.00 en baselgia s. Vigeli Sedrun. Gievgia, ils 27 da december allas 20.00 en baselgia S. Gions Mustér.