L’aura magnifica sco grond magnet

DA GION NUTEGN STGIER / ANR

Bun onn da gestiun per la Viafier retica grazia a l’aura da bellezza durant la stad e l’atun. Bunamain sin tut ils trajects principals è il dumber dals giasts transportads s’augmentà. La perfuraziun dal tunnel da l’Avra è stada ina culminaziun en l’onn da fatschenta 2018. Per ier gievgia aveva la Viafier retica envidà ils represchentants da las medias ad ina conferenza per preschentar la bilantscha intermediara da l’onn da gestiun 2018. Gì lieu ha quella en in tren, dentant en in tren nunusità. In anteriur tren da panorama dal Glacier Express è vegnì transfurmà en ina stanza da sedutas rullanta. Quel tren sa numna «Inno Tren» è duai star a disposiziun a la publicitad, a manaschis, uniuns e vischnancas per sedutas ed er per autras sentupadas. Il tren è endrizzà cun la pli moderna tecnica ed el porscha plaz a passa 15 persunas. Gia per il Forum mundial d’economia duai el star a disposiziun, ha ditg Renato Fasciati, 
il directur da la Viafier retica. Da prender a fit quella stanza da sedutas rullanta custa per in di 2500 francs, inclus 
il viadi.

L’urs sco calamitad

Sco che Stefan Engler, il president dal cussegl d’administraziun da la Viafier retica, ha ditg saja il 2018, l’onn da giubileum 10 onns Unesco, stà in fitg bun onn. El saja stà fitg intensiv, però cun fitg bunas cifras. Tant Engler sco er Fasciati, omadus èn sa mussads ventiraivels quai che pertutga l’interess dals passagiers da viagiar cun la Viafier retica. L’onn 2017 era la frequenza tar ils giasts tranportads s’augmentada per 4% e quest onn fin a la fin da november era gia per 3,3%. Il pli grond plus ha il manaschi pudì nudar tar las lingias en l’Engiadina ed er tar il traject da Cuira–Arosa cun in plus da tuttina 12,1%. L’atun magnific e lura il nov parc d’urs ad Arosa ha carmalà per in pau daplis giasts sin quel traject. Cun il tren nostalgic da Filisur a Tavau èn schizunt 65 000 persunas idas.

Plain optimissem

Fasciati ha ditg che fin ils 31 da december 2018 vegnia la Viafier retica segir a surpassar il dumber da 12 milliuns passagiers. El discurra schizunt da cuntanscher eventualmain il dumber da l’onn da record, il 2010, cun in pau daplis passagiers che 12 milliuns. L’aura dad aur durant la stad e l’atun haja contribuì il pli bler a l’augment da la frequenza da transport da persunas.

Damain autos tras il Veraina

Er en il traffic da vitgira ha la Viafier retica gì in plus da 0,5% daplis tonnas transportadas (35 tonnas dapli). Sa reducida è lura la frequenza tar ils dumber dals autos transportads tras il Veraina. Quella cifra è sa reducida per 3,5%. La raschun saja che cun la blera bell’aura sajan blers giasts sa decidids d’ir cun l’auto sur il Pass dal Flüela empè da dad ir tras il Veraina. Quai che pertutga la punctualitad saja da daventar pli serius, ha ditg Fasciati. Blers plazzals ed ils blers giasts sajan la raschun ch’ils trens hajan savens gì retard.

Puncts culminants

La Viafier retica haja er gì intgins puncts culminants, ha menziunà il directur. La perfuraziun dal tunnel da l’Alvra ils 2 d’october saja bain stada ina culminaziun fitg gronda. Er l’inauguraziun da la nova punt a Rehanau saja stada in punct culminant, ha ditg Fasciati. Er l’onn 2019 vegnia la Viafier retica a far vinavant investiziuns per bunamain 300 milliuns francs e quai per las sanaziuns da punts, viaducts, tunnels e staziuns.

36 novs trens

Ils davos onns ha il manaschi er adina puspè investà en l’infrastructura rullanta. Gia surdads al travagl èn ils trens Alvra che curseschan pli u main tranter Cuira e San Murezzan. Da nov vegnian ussa vitiers 36 trens moderns che sa numnan Capricorn. Ultra da quai survegn il Glacier Express er in tren da luxus. Il Bernina Express vegn da nov er a partir davent da Landquart a Tavau e da là a Filisur fin Tirano. Festivà vign lura er il giubileum 20 onns Veraina e quai il mez da november 2019. La festa da la viafier, quella ha lieu da Tschuncaisma a Bravuogn.