Concert da beneficenza

(anr/ac) La Societad da musica Breil/Dardin, il Chor-baselgia Breil ed il Chor viril Breil sepresentan communablamein a caschun dad in concert da beneficenza en favur dalla sanaziun dalla baselgia parochiala da Breil. La musica sco ils dus chors han elavurau in program musical che va bein a prau cul temps dils firaus. La musica da Breil/Dardin sut la bitgetta da Guido Bass dat l’entschatta cun tuns tradiziunals. «A Christmas Celebration», in arranschament da Barry Darrol, per cuntinunar cun «Nottingham», ina melodia da Mozart arranschada da Goff Richards. Suenter quellas melodias d’entrada fa la musica plaz al Chor viril Breil dirigius dad Andrea Veraguth de Groot. Ils umens laian resunar «In tschiel plein steilas» da Flavio Bundi tenor in text da Donat Cadruvi e denter auter era «Il himni dils aunghels», in arranschament da Gion Antoni Derungs. Il chor-baselgia che vegn dirigius dad Umberto Camathias porscha ella baselgia parochiala da Breil «Nadal, Nadal», ina canzun tradiziunala arranschada dad Armin Caduff ed a prau cun ulteriuras melodias era «Jubilate Deo», in text liturgic intunaus da Peter Angela. Il punct culminont dil concert dalla musica e dils dus chors fuorma bein la presentaziun communabla. Ina dad ellas ei bein enconuschenta e secloma «Clara notg» da Franz Gruber. Moderaus vegn il concert dad Otmar Seiler. Finanziar ina sanaziun dad in edifeci sacral ei malgrad las diversas contribuziuns ed agens mieds a disposiziun ina sfida per ina pleiv. Quei vala era per la pleiv da Breil ch’ha priu a mauns in’adattaziun energetica dalla baselgia ella summa dad 1,35 milliuns francs. Dalla summa totala ein aunc 390 000 francs buca curclai. Per gidar a curclar quella summa ein las uniuns culturalas da Breil sedecididas dad organisar in concert en favur dalla sanaziun dalla baselgia. La musica da Breil/Dardin, il Chor-baselgia ed il Chor viril da Breil sepresentan ils 27 da december a Breil ella baselgia parochiala allas 20.15.

Reservaziuns via edecom.ch ni 079 953 70 20.