Osterwalder succeda a Marcus Caduff

(anr/abc) Il cussegl d’administraziun dall’organisaziun turistica Surselva Turissem SA ha reglau la successiun el presidi. Igl 1. da schaner 2019 daventa Simon Osterwalder successur da Marcus Caduff. L’organisaziun Surselva Turissem secumpona da sis partenaris, quei ein las vischnauncas Ilanz/Glion, Lumnezia, Breil, Sursaissa Mundaun sco era las pendiculars Sursaissa SA/Péz Mundaun SA, las pendicularas Breil-Vuorz-Andiast e l’organisaziun Lumnezia Turissem. La societad exista dapi il mars 2010 ella fuorma d’ina societad anonima. En ses statuts ha quella definiu ch’ella unescha las purschidas turisticas dils partenaris, naven dil sport d’unviern tochen tier las purschidas per famiglias, viandar, velo e cultura. Ils davos onns ha Marcus Caduff da Morissen, il designau cusseglier guvernativ, menau il cussegl d’administraziun. Cugl 1. da schaner ei quel niev schef dil departament cantunal dall’economia publica e socialesser. Sco quei ch’il cussegl d’administraziun dalla Surselva Turissem ha communcau vendergis ei la successiun ussa reglada. Naven digl 1. da schaner 2019 surpren Simon Osterwalder da Thalwil il tgamun strategic dall’organisaziun. Il niev president deriva da Sogn Gagl, ei advocat promoviu e partenari dalla canzlia Bratschi a Turitg. El ei attaschaus alla regiun entuorn il Mundaun dapi 15 onns, maridaus e bab da treis affons. Ensemen cun sia dunna ha el cumprau igl onn 2015 il hotel Mundaun a Morissen ch’ei actualmein en renovaziun. La Surselva ha Osterwalder empriu d’enconuscher era sco directur dalla Suissedigital, l’Associaziun svizra dallas reits da communicaziun. Tochen igl onn 2005 eis el staus sportist d’elita, el ha dau ballamaun cullas equipas da Sogn Gagl, Winterthur, Turitg e Thun ed absolviu 40 giugs sco goli cull’equipa naziunala.