«Dil stgir al clar» a Trun

(anr/abc) La scola da Trun ha organisau venderdis vargau per l’emprema gada ina festivitad d’advent. Igl ei buca stau ina casualitad ch’ins ha terminau quella exact sils 21 da december. Igl ei il solstezi d’unviern cul pli cuort di digl onn. Tut ils affons cul persunal d’instrucziun ei serimnaus la damaun allas 07.10 sin plaz-scola. Leu ha il menader da scola Peter Kreiliger beneventau tuts e rendiu attent al solstezi. Las davosas jamnas eis ei numnadamein vegniu stgir pli baul e la damaun ha ei cuzzau ditg entochen ch’ei ha entschiet a catschar dis. Duront ch’el ha introduciu ils scolars glischava la steila dalla damaun ferm e clar. Ei fuva aunc stgir, mo quella steila ch’ei cumparida sur il Péz Titschal encunter sid dil vitg tarlischava el stgir sco ina ferma cazzola empalonta. Suenter ein ils differents scalems dalla scola sereparti en gruppas per far ina devoziun da rorate. Ils gronds ein parti cun tizuns encunter la resgia e la plazza da ballapei. Culla catecheta e scolasta d’etica Gabi Cabalzar ein els i encunter la baselgia parochiala. Il davos tschancun han tuts observau la supplica da caminar tgeu e senza discuorer, mo contemplond la cuntrada ed observond il di che «s’envida». Ella stgiraglia ein tuts entrai en baselgia, duront la cuorta devoziun han ins saviu sentir e veser co igl ei vegniu clar. Sillas 08.30 ein tuttas gruppas returnadas sin plaz-scola, silsuenter han tuts gudiu in bien solver communabel. Mintga classa haveva preparau ina producziun cuorta tier la tematica dil stgir e dil clar e digl advent. Cun canzuns da Nadal han tuttas e tuts presents cumpletau la festivitad unica dalla scola. Avon che relaschar ils affons e giuvenils ellas vacanzas da Nadal ha ei dau ina davosa surpresa: Scolaras e scolars, scolastas e scolasts han fatg da nanin. Mintgin haveva tratg ora in scret cun in num d’in conscolar, scolasta ni scolast. Mintgin ha retschiert in schenghetg sco simbol dalla beinvulientscha e legria da Nadal.