Schi en mecanist agricol decorescha igl pignoul

DA GION NUTEGN STGIER / ANR

Siva Nadal dalla baselgia è adegna stada responsabla l’uniun da giuventetna. Chella exista pero betg ple, uscheia tgi igls mats e las mattas tgi èn betg maridos segnan ossa per la decoraziun digl pignoul. An ena famiglia segnan savens igls unfants per la decoraziun digl pignoul da Nadal, els tgi sa legran er igl pi fitg sen la festa dalla gleisch e dalla glorgia. Igls pignouls da Nadal tg’ins veia ainten las vischnancas, per la decoraziun da chels èn igl ple responsabels igls luvrants da cumegn. La decoraziun è spert fatga cun esser ella ena illuminaziun artifiziala. Igls pignouls da Nadal ainten nossas baselgias vignan igl ple decoros digls calosters u dallas calostras. I dat er excepziuns scu per exaimpel a Mot.

La presidenta è cuntainta

Mot è ena vischnanchetta cun vers 60 abitants. An îgl croda dalunga er la pitschna baselgia tgi è situada sen ena collina ed è er ena part dalla cuminanza da vischnanca. Chegl vala er per igls mats e las mattas tgi decoreschan gio decennis igl pignoul da Nadal dalla baselgigna. Durant plessas generaziuns è l’Uniun da giuventetna Mot stada responsabla per ornar igl pignoul da Nadal dalla baselgia. Siva d’en pêr onns dattigl betg ple l’uniun cun simplamaintg mantger la giuventetna a Mot. Heidi Buchli, ella tgi è presidenta digl cumegn-baselgia, è cuntainta tgi oz segnan mats nubils e mattas nubilas per la decoraziun digl pignoul da Nadal. I seia ena bela tradiziun ed a chella sa tignan er chellas pacas persungas giovnas tgi Mot vegia oz anc, chegl tgi fetscha grond plascheir.

Fatg vign chegl voluntariamaintg

Heidi Buchli, ella catta angal bungs pleds per igls treis mats e la matta tgi on decoro treis deis avant Nadal igl pignoul an baselgia. Igls giovens fetschan chegl voluntariamaintg ed els sa legran er mintg’onn da pudeir far la decoraziun. Remarcabel è tuttegna tgi da chels treis mats èn dus betg da Mot, mabagn da Solas soura tgi totga politicamaintg tar igl cumegn da Vaz. «Per nous è chegl persasez tgi giagn cun plascheir adegna er a decorar igl pignoul da Nadal», deian igls dus frars Marcel e Stefan Buchli.

Quatter differentas professiuns

Gist igls treis mats on an lour professiun strousch da far ensatge cun decoraziuns, ornamaints, candeilas e lametta. Marcel Buchli è da mastier electricist, sies frar Stefan Buchli è pour cun corp ed olma ed Andri Meier, tgi ò er decoro tenor sies gost igl pignoul da Nadal, è da professiun mecanist agricol. Els treis seian angal igls manuals, punctuescha Stefan Buchli. La scheffa da decoraziun seia Laura Thomann. La matta ò an sia veta professiunala scu assistenta da pratica da medi bagn ena lavour pi fegna tgi igls treis cumpogns ed uscheia er la dretga sensibilitad tgi dovra per decorar en pignoul da Nadal.

Chest onn 
candeilas alvas

Per la schelta dallas cullas da Nadal è Thomann stada responsabla. Ella saptga pi bagn tge calours tgi geian bagn a pêr cugl pignoul da Nadal, on detg igls treis mats. Stefan Buchli, el è alloura sto digl meini tgi cun las cullas d’argient fetschan candeilas alvas la pi bela parada tgi candeilas cotschnas. «Avant en onn vainsa mess segl pignoul candeilas cotschnas», dei igl pour. Adegna puspe on igls treis mats e la matta contemplo igl pignoul per vurdar schi la decoraziun tanscha e schi ella fetscha ena buna paretta.

Rompa ena culla costigl 
ena runda

Marcel Buchli, el rachinta tgi schi ena culla rompa u croda giu digl pignoul costigl ena runda. Usit è er tgi siva aveir decoro igl pignoul ins vo an cuminanza a bever ensatge. Tradiziun è er tgi igls mats e las mattas tgi on orno igl pignoul dastgan durant igl cult divin dalla viselgia da Nadal anvidar las candeilas. Chegl seia ena veira onour, dei Stefan Buchli cun en surreir. Far chegl ed er decorar igl pignoul pon igls treis giovens e la matta er an en onn, schinavant tgi tots èn anc nubils…!