La pbd pretenda novas reglas 
per l’export d’armas

(cp) La pbd dal Grischun sustegna l’iniziativa cunter l’export d’armas en terras cun guerras civilas. Ina largia allianza vuless ch’il parlament e la populaziun possian cundecider per reglar l’export da material da guerra. Uschia duai vegnir impedì ina giada per adina l’export d’armas en pajais cun guerras civilas ed en terras che violeschan da maniera greva e sistematica ils dretgs umans. La pbd dal Grischun sustegna «l’iniziativa da correctura» lantschada dacurt.

Entant ch’ils concerns d’armament pretendan da liberalisar il reglament d’export è la fracziun federala da la pbd svizra s’occupada intensivamain cun la situaziun pertutgant ils export d’armas. Ella pretenda cun trais diversas intervenziuns per l’ina da reponderar la fatschenta e per l’autra surtut dapli legitimaziun democratica. Las pretensiuns da la pbd vegnan sustegnidas d’ina largia allianza. Uschia è dacurt vegnida lantschada «l’iniziativa da correctura» che pretenda novas reglas politicas pertutgant l’export d’armas. «Cun l’iniziativa da correctura na vegniss la controlla sur da l’export d’armament betg pli reglada sin il livel d’ordinaziun, mabain sin livel constituziunal e legislativ. Be uschia è garantida la cundecisiun da parlament e populaziun», è la persvasiun da cusseglier naziunal Duri Campell.Il lantschament da l’iniziativa da correctura segira che la tradiziun umanitara da la Svizra vegn defendida e la cundecisiun da la populaziun è garantida. Quant impurtanta che quella cundecisiun è è sa mussà ils ultims mais, essend ch’il cussegl federal ha gì d’annullar sin fundament da la pressiun da la populaziun sia decisiun da lubir en l’avegnir l’export d’armament en terras cun guerras civilas. La finamira da l’iniziativa da correctura èsi da serrar las portas davos per exportar armas en pajais cun guerras civilas. «Restan las reglamentaziuns sin il livel d’ordinaziun po il cussegl federal liberalisar quella da tut temp», constatescha Campell cleramain. Export d’armas en terras cun guerras civilas che violeschan sistematicamain e gravantamain ils dretg umans duajan ussa vegnir impedids ina giada per adina. «La decisiun, sche la Svizra duai sustegnair exports d’armas destinads per pajais cun cunflicts guerrils, na dastga betg vinavant vegnir decidida sulettamain dal cussegl federal, mabain quella pertutga nus tuts», di Campell. Il comité directiv da la pbd dal Grischun sustegna «l’iniziativa da correctura» e sia pretensiun da stgaffir novas reglas per l’export d’armas.

Dapli infurmaziuns davart l’iniziativa menziunada e la rimnada da suttascripziuns sa chattan sin la pagina www.wecollect.ch