Avon 500 onns – 
epoca turbulenta

(anr/abc) Igl 1. da schaner 1519 ha Huldrych Zwingli entschiet sia nova plazza al Grossmünster a Turitg. Quei che cuava dapi decennis, quei ch’ils pussents dil Tard medieval han empruau cun tutta forza da supprimer ed impedir, ei gartegiau a treis predicaturs: a Martin Luther ella Prussia, a Jean Calvin a Genevra ed a Huldrych Zwingli a Turitg. La Reformaziun el Grischun ha Zwingli influenzau decisivamein. Cull’installaziun da Huldrych Zwingli igl 1. da schaner 1519 al Grossmünster a Turitg ha la viulta radicala en Svizra entschiet. Ei fuva vegniu aschi lunsch che Svizzers battevan ellas battaglias encunter camerats e cumpatriots. Daners, gagliardia, rihezia ed immoralitad nutrevan luschezia, egoissem e scuidonza. Quei tut criticava Zwingli massivamein. Il reformatur veseva la pietusadad da mintgin e la vera aduraziun en Diu autruisa che d’incassar daners cun commerci da perduns, baghegiar catedralas e menar il pievel pil nas. Ils onns 1524 tochen la mort da Zwingli 1531 duront la secunda battaglia da Kappel a. Albis ein stai turbulents. Cun 67 tesas haveva el fixau igl uorden che dueva valer per la confessiun reformada. Igl onn 1529 fuva el viagiaus en Tiaratudestga cugl intent da s’entupar a Marburg cun Martin Luther. Els fuvan buca amitgs.

pagina 8