Claustra benedictina da Mariastein

(anr/gc) L’Agentura catolica da novitads (kath.ch) ha publicau ina liunga intervesta cun avat Peter von Sury, da Mariastein, e Mariano Tschuor ch’ha surpriu cun Daniev la realisaziun dil «Project Mariastein 2025». Igl anteriur commember dalla direcziun generala dalla Societad svizra da Radio e Televisiun (SSR) ei ius cun la fin da 2018 anticipadamein en pensiun. Cheusut ina resumaziun. Avat Peter von Sury ei fetg leds ch’igl ei stau pusseivel da saver signar il december vargau ina cunvegna cun Mariano Tschuor. Igl avat constatescha: «Nus duvrein ina midada ella baselgia.» Tenor Tschuor vegnien tuts: avat, convent, la menadra dall’economia, la vischnaunca, ils vischins sco era el sez a collaborar. (La claustra da Mariastein ei situada sin intschess dalla vischnaunca da Metzerlen – buca lunsch naven da Basilea – el cantun Soloturn.)

Mariano Tschuor – 
fatg amogna da segidar

Tschuor enconuschi – tenor avat Peter – gia daditg la claustra da Mariastein. 2016 hagi el scret ina brev e fatg amogna da segidar. Ina tala caschun seigi da nezegiar. Igl avat appreziescha co Tschuor capeschi d’ir entuorn cun la glieud. Quei gidi da semetter alla meisa rodunda cun carstgauns zun differents, da tractar damondas contraversas ed arrivar a sligiaziuns. Tschuor fa nuot in denter l’auter. El porta novas ingredienzas en nossa veta claustrala contemplativa. Varga la mesadad dils conventuals han sur 80 onns. Ei regi la tendenza da prender tut bravamein pacific. Perquei eisi mo d’avantatg sche zatgi vegn d’ordeifer e sustegn nus beinvulentamein. Sin la damonda, schebein Mariastein hagi ussa dus schefs, di avat Peter che siu schef seigi en tschiel, ed el silpli siu souschef. Tier ils benedictins vegnan tuttas decisiuns pridas en unanimitad.

Tschuor di ch’el selaschi maina en sin l’organisaziun, mobein sulet sin carstgauns. En claustra hagi ei persunalitads fermas e scoladas. Contonscher unanimitad pretendi bia lavur. Tschuor vesa sesez sco partenari (Sparringpartner) d’avat Peter. Las decisiuns pren il convent.

Dimora a Laax – 
il biro a Mariastein

Tschuor ha fundau ina societad cun responsabladad limitada (GmbH) e lavura tenor mandat cun la claustra. Sia dimora principala vegni ad esser a Laax. A Mariastein ha el ina pintga habitaziun sper la claustra. Mintgamai, cu el ei leu, sedrezza el tenor il ritmus dils conventuals. Quels muments spirituals seigien per el fetg prezius.

Ei detti el rom dil «Project Mariastein 2025» gia prelavurs. Ussa seigi ei d’elaborar las structuras, nuar contacts e menar discuors intern- ed externamein. La damonda centrala secloma: Pertgei fagein nus quei, daco duei in liug da pelegrinadi haver in avegnir en in mund secularisau? Ei il monarchissem tier nus in model sin svanir, ni ha el vinavon ina schanza? Forsa era per laics? La finala va ei per far ord enzatgei existent zatgei niev.

Secund avat Peter ein las claustras stadas pli baul in impurtont spazi da resonanza per il plaid da Diu. Ussa savein nus crear in niev.