Cun forzas unidas vers Burgdorf

DAD ANNATINA FILLI / ANR

D’utuon ha lö la Festa da musica federala per giuvenils a Burgdorf. Las trais musicas giuvenilas da l’Engiadina Bassa e da la Plaiv as partecipeschan cumünaivelmaing a quista gronda festa. Id es sonda davomezdi. Our da la chasa da scoula da Scuol strasunan ils tuns da flötas, clarinettas, saxofons, trumbettas e dad oters instrumaints da flà e da percussiun. Las musicas da giuvenils da l’Engiadina Bassa, da Valsot e da la Plaiv-Zernez s’han inscuntradas per lur prüma prouva da musica cumünaivla. Passa 60 musicantas e musicants in l’età da 10 fin 25 ons as preparan per la prosma Festa da musica federala per giuvenils a Burgdorf.

Na la prüma vouta 
da la partida

Na per la prüma vouta as partecipescha la Musica da giuventüna Engiadina Bassa (MGEB) ad üna Festa da musica federala. Fingià da l’on 1993 as vaiva fat il viadi a Frauenfeld per as preschantar musicalmaing ad üna giuria e da’s laschar congualar cun musicantas e musicants da la medema età da tuot la Svizra. Divers amatuors da musica vaivan gnü da l’on 1983 l’idea da fundar üna società da musica per giuvenils da la regiun Engiadina Bassa. «Hoz vaina 43 commembras e commembers e la gronda part deriva da Sent. Ma eir da las otras fracziuns dal cumün da Scuol as partecipeschan giuvenils a nossa società», manzuna Regula Felix, la presidenta da la MGEB. Grazcha al dirigent Flurin Lehner, chi abita a Zernez, as partecipeschan singuls eir da quel cumün a la musica regiunala. Sco ulteriuras societats da giuvenils cugnuoscha eir la MGEB fasas da grond e da quellas da pac interess. «Pel mumaint vaina güsta darcheu üna buna fasa ingio cha singuls sun buns d’animar a l’ün o l’oter da far musica da cumpagnia», uschè la presidenta.

Our da trais fat üna musica

Per Felix es la collavuraziun actuala da las trais musicas giuvenilas tanter oter eir ün proget unic. «Mincha musica suletta es massa debla per as partecipar ad üna Festa da musica federala», manzun’la, e: «Cumünaivelmaing daja ün orchester cun registers egualisats e cun quai as poja far musica sün ün bun nivel.» L’idea da’s partecipar cumünaivelmaing a la festa da musica a Burgdorf han gnü ils duos dirigents e la dirigenta Tania Lehner da las societats pertoccas. «Nus da la Musica giuvenila Valsot (MGV) d’eiran da l’avis chi’s pudess darcheu üna vouta as partecipar ad üna festa da musica», disch Jon Flurin Kienz, il dirigent da la MGV. Qua cha’ls respunsabels da la MGEB vaivan fingià l’intent dad ir a Burgdorf s’esa tanter pêr gnü a l’idea d’integrar eir la MGV e la Società da musica da giuvenils la Plaiv-Zernez ed «uschè vaina decis da far per la festa da musica our da trais societats üna». La Società musica da giuvenils La Plaiv-Zernez es la plü giuvna società da quellas trais chi’s partecipeschan a quist proget cumünaivel. «Pels commembers da quista società es la partecipaziun voluntaria ed istess sun fich blers d’els qua a nossa prüma prouva da musica», constata Kienz. Cun prouvas da registers ed üna cun tuot l’orchester s’haja dat a tuot las partecipantas e partecipants la pussibiltà d’imprender a cugnuoscher il toc da gara, il toc da lezcha ed il toc per marchar. «Fin a la festa a Burgdorf vaina previs amo quatter prouvas d’ün di e trais prouvas da musica dürant la saira», manzuna Kienz.

Als 7 avrigl es previs il concert cumünaivel da la Musica da giuventüna Engiadina Bassa, da la Musica giuvenila Valsot e da la Società da musica da giuvenils La Plaiv-Zernez.