«Ei dat buca biars misteris da far pizza»

DA SUSI ROTHMUND / ANR

Il mardis han rodund 40 pizzaiolos e singulas pizzaiolas priu part dalla «Coppa Svizzera della Pizza» ch’ha giu liug el Resort Catrina a Mustér. Quei cup ei vegnius organisaus dil pizzaiolo dalla casa, Claudio Vicanò, che porta in tschuat tetels, sco per exempel quel dil super campiun dil mund e dall’Europa en far pizza. Silmeins ell’Italia ei il mund dils pizzaiolos dominaus dils umens. Il mussament ch’era dunnas san esser pizzaiolas scosauda ei la Taliana Filomena D’apote da Lesina ella Puglia. Era ella ha priu part dalla cuppa ed ei semesirada culs umens en duas categorias. Sco la menadra dalla Pizzeria La Trave ha detg all’Agentura da novitads rumantscha ei il far pizza ina caussa emoziunala ed adina puspei ina sfida per ella. Che la dunna plein temperament ha eligiu per sesezza in mistregn ord ina domena dad umens ei sedau: «Jeu hai entschiet a far pizza e sun s’inamurada, igl ei ina pissiun.» Prender part da concurrenzas seigi per ella ina caschun da far novas experientschas e quei enriheschi. Ins vesi co ils auters lavurien, seconfrunti e sappi turnar a casa cun novas impressiuns.

Tenor D’apote dat ei buca biars misteris da far pizza. Tuttina manegia ella che mintgin hagi ils ses, era ella e quels lessi ella buca tradir. En mintga cass veseva quei ora ualti professiunal cu ella fageva sia pizza classica. In’atgna invenziun cun basa alva da mozzarella di bufalo, ina sort carn piertg extrem grassa e figs secs. In’interessanta mischeida che gustava oreifer. Per daventar supercampiunessa ha ei denton buca tunschiu diltut, quei tetel ei numnadamein ius il mardis al pizzaiolo Antonio Campanella da Pisa.

Ina scola svizra da pizzaiolos

Igl organisatur Claudio Vicanò ha survegniu maun liber da sia scheffa Margrith Gianola. L’Engiadinesa ei leda d’haver il star-pizzaiolo el Resort Catrina. Biars hosps vegnien aposta el Catrina per guder ina pizza da Claudio e quei ton dalla regiun sco perfin digl exteriur. La concurrenza vegn sponsurada dil Catrina, mo era da sponsurs dalla regiun e da producents sco Galbani, Caputo ed aschia vinavon. La tiarza ediziun dalla «Coppa Svizzera della Pizza» ei vegnida organisada en collaboraziun cun l’Associazione pizzaiuoli Molisani e l’Associazione pizzaiuoli Napoletani. Al Catrina porta quell’occurrenza publicitad e sco Gianola spera era novs hosps. Il mardis han ils hosps dall’ustria saviu guder pizzas dils pizzaiolos ch’ein vegni dall’Italia, dil Tessin, da Berna ni dall’Austria. Sco Gianola ha tradiu hagien ei ludau las pizzas, ils hosps da tschep hagien denton manegiau ch’ei seigi bien, mo buca la pizza sco quella da Claudio. Ils onns vargai ha Vicanò organisau cuors da pizzaiolos a Mustér. Quels mavien denton sur l’organisaziun dall’Italia e custavien in tschuat. Uss organisescha il campiun mundial sez cuors svizzers e quels duein lu era esser pli favoreivels, aschia che tuts interessai san prender part e sescolar egl art da far pizza.

Proxima sfida – Las Vegas

Vicanò ei oriunds da Roma e cun sias distincziuns survegness el senz’auter era plazza ell’Italia. Sco el di ei la situaziun economica denton difficila. L’Italia metti tuts en difficultads cun pagas bassas ed in tschuat taxas. Il pizzaiolo ha famiglia e gudogna perquei siu paun da mintgadi en Svizra. Cun siu surrir paradescha el sin placats e products da Galbani, Vicanò ei numnadamein ambassadur da quella firma en Svizra ed ell’Austria. El ei denton mudests e manegia che quei hagi buca midau sia veta, el sesenti buca sco model. Ei seigi denton ina certa renconuschientscha per quei ch’el hagi contonschiu ils davos onns. Igl onn vargau ei il pizzaiolo da Mustér daventaus supercampiun en Frontscha. Sia proxima sfida ei in cup mundial ch’ha liug il mars a Las Vegas. Leu semesiran ver 1000 pizzaiolos digl entir mund e Vicanò separticipescha culla speronza da vegnir rangaus sut ils emprems 20. Per el ein la professiunalitad e la pissiun il pli impurtont per far pizza e buc il davos era las ingredienzas. «Jeu sai buca star senza far pizza, jeu siemiel da far pizza ed inventel adina puspei novas variantas, sco per exempel las pizzas d’art cun fatschas da prominents ni las pizzas da dessert cun glatsch ed auter.» In hosp illuster a Mustér ei Umberto Fornito da Neapel staus. Sin l’emprema egliada – el era vestgius tut en alv – havess ins pudiu tertgar ch’ei setracti d’in pilot da formula 1. Mo era Fornito ei in pizzaiolo da renum mundial cun in tschuat tetels da campiun. El ei gia staus campiun mundial ed a Las Vegas ed uonn vegn el a concuorer leu ella categoria dils megliers dils megliers. Il possessur dalla Antica Pizzeria Frattese ha declarau ch’ins stoppi crer en quei ch’ins fetschi e far quei cun amur, pertgei mo lu vegni ei bien. Ei seigi da tractar bein gia la pasta per la pizza e buca pitgar entuorn sin quella sco in narr: «Quei ei sco cullas dunnas, sch’ins tracta bein ellas, lu ein ellas carinas.» Per el ei la pasta ch’el fa sulet cun aua, sal, frina e levon ina dallas parts las pli impurtontas dalla pizza e fetg impurtonta seigi era la cottura. Perquei preferescha il campiun mundial las pizzas semplas cun mozzarella, tomata ed agl ni cun tomatas, oregano e basilicum. «Tier quellas sentan ins il meglier sch’ellas ein gartegiadas ni buc.»