La pli bainvulenta 
partida vers ils purs

(cp) La «Bauernzeitung» ha valità dacurt tge partida che saja la pli bainvulenta vers ils purs en Svizra. Cun plaschair pren la pcd grischuna notizia ch’ella saja cun distanza la pli bainvulenta partida vers ils purs. Cun cuss. naz. Markus Ritter, president da l’Uniun purila svizra, ed anc auters represchentants dals purs s’engascha la pcd sin plaun federal per ils interess da l’agricultura.

La pcd ha gia punctuà pli baud tar cumbats electorals – uschia era 2015 – ch’ella s’engaschia per ina politica agrara che garanteschia als purs tant en muntogna sco en la Bassa in’entrada segira. Quai valia era per las proximas elecziuns. La pcd vegnia perquai a s’engaschar a favur d’ina consequenta politica agrara che resguarda las pretensiuns spezialas da l’agricultura tant en las muntognas sco en la Bassa. L’agricultura duai sa concentrar sin sia incarica principala, numnadamain da producir victualias. Plinavant ha quella era da tegnair quint dals interess creschents da l’ecologia en la populaziun.

Da preschent succeda la procedura da consultaziun davart la politica agrara 2022+. La pcd vegn a s’engaschar na sulet per mantegnair las contribuziuns a l’agricultura. Ella vegn er a sustegnair la planisaziun da l’agricultura a lung termin, quai che vegn pretendì da giuvens purs e puras. I sto esser pussaivel gist per giuvens e giuvnas en l’agricultura da pudair planisar a lung termin. Perquai è la pcd era persuenter che la planisaziun vegnia segirada.