Niev vehichel tgietschen

(anr/abc) Il november vargau han ils pumpiers da Sagogn retschiert lur niev vehichel pign. Ei setracta d’in Toyota Hilux cun ina punt ch’ei equipada tenor las normas per l’emprema intervenziun sil plaz. Mesjamna suentermiezgi ha Thomas Candrian, igl officier dil corp e vicepresident communal, envidau ad in’uatga ufficiala cun presentaziun dil vehichel. La radunonza communala da Sagogn haveva dau il december 2017 glisch verda per la cumpra digl auto niev. Quel remplazza in auto d’occasiun che la vischnaunca haveva saviu acquistar fetg favoreivel igl onn 2010 dil marcau d’Illnau-Effretikon. Quei vehichel vegl ha fatg zacons survetschs ils diesch onns vargai. El haveva denton in grond disavantatg: El fuva memia plauns per l’intervenziun immediata en ina regiun decentrala sco quella dallas quater vischnauncas Falera, Laax, Sagogn e Schluein.

Il vehichel niev d’emprema intervenziun che la vischnaunca da Sagogn ha uss acquistau ademplescha tuttas pretensiuns da prestaziun. La punt annexa ed igl equipadi digl auto han ils scharschai Michael Caderas e Pedro Miguel da Silva planisau tenor lur experientschas praticas. La cumissiun da pumpiers haveva preparau la cumpra cun evaluar ils criteris e definir cundiziuns da prestaziun. Da pliras offertas ei quella dil garaschist da Glion Aldo Beeli resortida sco megliera. Ils gronds avantatgs dil Toyota Hilux ei ch’el ei bia pli sperts, pli levs e pli movibels. Per l’emprema intervenziun dispona el d’ina scala dad otg meters, in uder da 60 meters, in butschin da suflar si per transportar cul helicopter treis cubics aua. Igl agregat per forza electrica d’urgenza s’auda secapescha era tier l’intervenziun sperta sil plaz, medemamein la pumpa che squetra aua cumprimida cun 200 bars. Per saver remplazzar il vehichel vegl haveva la radunonza communala da Sagogn lubiu il 2017 in credit da 50 000 francs, vitier ha ella lubiu 20 000 francs el preventiv 2018 per adattar il local da pumpiers a Val Casti allas pretensiuns praticas.

Ils pumpiers da Sagogn ein, tuttina sco ils pumpiers da Schluein, associai al Corp da pumpiers Laax-Falera. A tuttas quater vischnauncas survescha in sulet corp. Quel exercitescha communablamein ed era l’alarmaziun succeda da maniera unificada sur il perimeter definiu. Ils pumpiers Falera-Laax-Sagogn-Schluein ha a disposiziun in parc da vehichels, pumpas ed equipadi da pumpiers ch’ei staziunaus en tuttas quater vischnauncas. Quellas han reglau il sectur dils pumpiers en in consorzi da pumpiers. Il cumandant dils pumpiers Andreas Walser da Laax ha a disposiziun in corp spert, cumpetent e scolaus tenor las normas cantunalas. Il niev vehichel che Sagogn ha acquistau s’auda leutier e survescha al scop dil consorzi da pumpiers. Sch’ei brischa pia a Schluein vegn igl auto tgietschen da Sagogn. Per l’emprema intervenziun sto el forsa era carrar aschi spert sco pusseivel el territori da Laax ni Falera.