Ovras an ena buna gleisch

(cp) Nateira singulara, ovras da carstgangs ed installaziuns dad art, illuminadas subtil. Objects dad art tgi procuran per visibladads inspirontas. L’uniun Veia da l’ava Alvra lascha cun «gleisch dall’ava» vaseir, s’accorscher ed experimentar chegl tgi la nateira ans ò schintgigia. «Gleisch dall’ava» porscha plaz per star salda, trer igl flo, refonder. Ainten en li tgi vei igl anviern nign suglegl. A l’olma fò chegl tuttegna bagn.

Sonda, igls 5 da schaner 2019 allas 18.00 ad Alvagni Bogn. I neiva, gl’è ena fardaglia. Blers indigens e giasts, igls mastrals digls cumegns dad Alvra e Barvogn Filisour, èn nias beneventos dasperas en bel fi ed èn nias manos sen la punt viglia dall’Alvra.

Thomas Kollegger, igl president da l’uniun, dei: «Cun noss project ‘Gleisch dall’ava’ giainsa anavos tar la moda naturala da vaseir. Tancar energeia monta per nous da porscher a vous igl ‘pac’, betg daple e betg pi pac.»

Andreas Oberli tgi è ansemen cun Roman Plaz responsabel per la transposiziun artistica accentuescha durant la guidada: «Betg angal igl carstgang stgaffescha art, mabagn er e surtot la nateira. Igl carstgang cun sias ovras dad art è cò angal en med. ‘Gleisch dall’ava’ punctuescha ovras d’art dalla nateira (schaladas, glatsch, candeilas da glatsch, curs dall’ava) cun gleisch subtila e cumplettescha tot chegl cun art stgaffeida digl carstgang.»

Ovras stablas – 
ovras momentanas

L’uniun Veia dall’ava ò fixo ainten igls statuts tgi igl elemaint ava duess neir duvro per purtar energeia mentala e duess neir tematiso. I duessan nescher ovras cuzzevlas per igls giasts e la populaziun dalla Val Alvra. Ovras permanentas e momentanas, chegl vot deir ovras tgi passan. Igl project «Gleisch dall’ava» vo bagn a pro cun igl artetgel ainten igls statuts.

La tribuna è averta…

La veia «Gleisch dall’ava» 2018–2019 è illuminada ed averta anfignen la fegn favrer mintga de ca. dallas 17.00–23.00. Igls 2 da favrer 2019 ò li en’ulterioura guidada. Cunchegl tgi dat er ensatge damagler fògl basigns da s’annunztgier (anfignen igl 28-1-2019 sot sekretariat@ansaina.ch, 076 499 19 83).

Veia dall’ava Ansaina

Ansaina (segn) è en pled tgi ins scontra adegna puspe ainten igl conturn dad Alvagni. Cun la veia dall’ava e cun ulteriours projects metta l’uniun tgi è neida fundada igl onn 2001 adegna puspe segns. Segns tgi la populaziun dalla Val Alvra è pronta da nizzigier igls potenzials tgi èn avant mang.