Premi Watt d’Or per 
in project grischun

Il Premi Watt d’Or en la categoria energias regenerablas va quest onn a la firma dhp technology en collavuraziun cun l’IBC Cuira. Mintg’onn surdat l’Uffizi federal d’energia il Premi Watt d’Or. Cun il premi vegnan ils megliers projects d’energia d’interpresas e da scolas autas onurads. Il Watt d’Or n’è betg dotà cun daners e duai simplamain procurar per dapli popularitad ed attenziun als projects. Il premi vegn surdà en quatter differentas categorias. Tecnologias d’energia: DEPsys SA ed IBB Energie AG cun il project «GridEye»; Mobilitad cun effizienza energetica: BLS AG ed Universitad Basel cun il project «Nina»; Edifizi e spazi: Fundaziun Habitat ed Adev societad d’energia cun il project «Erlenmatt Ost» ed en la categoria Energias regenerablas ha gudagnà: dhp technology ed IBC Cuira cun il project «Horizon». In tetg da solar ch’ins po faudar, quai è il project «Horizon» da la firma da start-up dhp technology ch’ha gudagnà in dals premis. Il tetg solar è vegnì installà l’avust per incumbensa da la firma IBC, il furnitur d’energia ed aua da Cuira, sur la serenera ARA a Cuira. La serenera producescha mintg’onn 540 000 uras kilowatt. Quai èn circa 20% da l’energia che la serenera ARA dovra. Il tetg solar ha ina surfatscha da 4150 meters quadrat.