Amprema partenza e gist gudagnea

DA GION NUTEGN STGIER / anr

300 meters avant la fegn dalla cursa ò Ilya Chernousov, igl Russ tgi stat a Lantsch, decidia la cursa a sia favour. El è partia scu grond favorit e tar sia amprema partenza er gist sto igl pi sensom igl podest. Arno Baselgia, igl matadour local, è eneda daple sto igl migler Surmiran. Igl interess pigl Planoiras cun ena distanza da 25 km e pigl Planoirino cun ena lunghezza da 12,5 km è sto fitg grond. Sa participos allas cursas èn 630 sportists e sportistas. La categoria principala è stada chella digls omens cun en domber da 280 passlunghists. Els èn tots sa misiros sen la distanza da 25 km cun la partenza all’Arena da biatlon a Lantsch anfignen Parpan ed anavos a Lai all’arrivada. Durant l’antiera cursa ògl navia an en cuntign, uscheia tgi las relaziuns èn stadas fitg pretensiousas. Ple u manc mintgign ò pitia pulit e cun records persunals è sto navot. Tiers la blera neiv nova è la cursa stada regulara, chegl graztga alla loipa tgi sa preschentava an en bun stadi. An chella tgossa ò igl team dad Urs Baselgia, igl president digl comite d’organisaziun, presto lavour exemplarica.

Livers e Bieler on procuro per tempo

Sa participos agl Planoiras èn er Toni Livers, igl passlunghist sursilvan, e Livio Bieler, igl sportist da Panadoz. Els totgan tots dus agl cader naziunal da passlung. La sia fegnameira era da star ad Ilya Chernousov, igl anteriour commember digl cader naziunal russ, segls caltgogns, el tgi ò per l’amprema geda fatg igl Planoiras. Igls dus Grischuns on alloura er procuro per bler tempo e ple u manc adegna stos alla testa dalla cursa. Chernousov, igl om dalla biatleta Selina Gasparin, è permamentamaintg suando a Livers ed a Bieler e chegl anfignen 300 meters avant l’arrivada a Lai.

Plascheir da sia victorgia

An sia lunga carriera da passlunghist ò Chernousov adegna puspe gia success sen camp internaziunal. Cun sa retrer digl sport da prestaziun ò igl Russ er antschet a far cursas regiunalas scu per exaimpel igl Maraton engiadines e dumengia passada ò igl om da 33 onns gia sia premiera tar igl Planoiras. 300 meters avant la fegn dalla cursa ò el surpasso igls sies dus concurrents. Aint igl spurt ò igl Russ laschea a Livers ed a Bieler nign stetg e gudagnea la cursa. Da gudagner ple u manc avant sies isch-tgesa seia bagn ensatge fitg singular, ò detg igl victour. El vegia galdia la cursa, er schi las relaziuns eran pretensiousas, ò punctuo Chernousov. Per igls 25 km ò el gia 65 minutas ed uscheia sto per otg minutas pi plang tgi Curdin Perl, igl Engiadines, tgi ò gudagnea igl Planoiras avant en onn. Livers, el tgi è nia sagond dumengia passada, ò pers dus secundas segl victour e Bieler scu terz perda sen Chernousov nov secundas.

Adegna alla partenza

En sportist tgi ò igls davos onns mai mantganto da far igl Planoiras è Nino Schurter, igl campiun mundial da bike e victour digl classamaint general dalla Coppa mundiala da bike. I seia sto pulit deir, persiva eneda daple ena grondiousa tgossa da far la cursa, ò menziuno Schurter. Termino la cursa ò igl sportist svizzer digl onn 2018 segl 14avel post. Per el igl migler post siva tgi el fò igl Planoiras. Sen Chernousov ò igl Lumnezian gia en retard da set minutas e fatg ena bilantscha positiva dalla cursa. El turna adegna puspe gugent a Lai cun aveir agl li angal belas regurdientschas.

Eneda daple Arno Baselgia

Dalla parteida all’occurrenza da passlung è er sto en bel domber sportists da nossa regiun. Nia a freida igl migler cun las relaziuns pitost «deiras» è igl matadour local Arno Baselgia. Igl om cun annada 1965 è nia 29avel e gia per igls 25 km diesch minutas pi dei tgi igl victour dalla Russia. Ensatge pi plang è sto scu 32avel Claudio Trinkler da Mon. Betg schi cuntaint cun la sia prestaziun è sto Livio Corsini da Lai, el tgi è igls davos onns adegna nia pi ferm e s’avanzo tar igl migler passlunghist da nossa regiun. El vegia unschia cumplettamaintg sbaglea e durant l’antiera cursa gia l’impressiun da betg neir anavant (52avel post). Da menziunar è tuttegna er anc igl 5avel post da Maurus Lozza, el tgi è uriund da Marmorera, datgesa a Zuoz ed è en veir talent tar Swiss Ski.

Terza victorgia

La cursa dallas donnas ò gudagnea Seraina Boner da Tavo, la partenaria da Livers. La victoura ò duvro per igls 25 km 76 minutas e festivo tar igl Planoiras la sia terza victorgia (2012, 2016 e 2019). Scu 15avla è Tanja Willi da Lantsch stada la miglra participanta da Surmeir. Ella para dad esser gio bagn an furma e cugl Planoiras er gia en bung trenamaint pigl maraton engiadines. Parteida tar igl Planoirino (12,5 km) è la biatelta Selina Gasparin. Ella ò alloura er gist declasso la concurrenza e festivo ena clera victorgia. Anc seia ella betg digl tottafatg pronta per cursas da biatlon, dantant an dus emdas vess d’esser schi gliunsch tgi ella parta tar las cursas da biatlon dalla Coppa mundiala, ò detg la mamma da dus mattignas e la donna da Chernousov.