Vaz budgetescha 
bler memia bass

(rtr) Dumengia proxima datti ina votaziun impurtanta a l’urna a Vaz. I va per il credit per remplazzar ils bajetgs vegls da la plazza da sport en il center da Lai. Prest sis milliuns francs duessan vegnir investids. Quai è bler dapli che quai ch’il preventiv 2019 preveseva cun 2,5 milliuns francs. La plazza da sport a Lai è da grond’impurtanza, saja quai l’enviern sco era la stad, scriva la vischnanca da Vaz en il messadi da votaziun. Uschia vegn la plazza l’enviern duvrada per ir cun patins, giugar hockey, curling e tschoccas sin glatsch. La stad vegn la plazza da sport duvrada per dar ballape, plinavant datti in percurs da currer da 100 meters. Tar la vischnanca da Vaz ins è ussa vegnì a la conclusiun ch’i dovra midadas. Ina cumissiun dal cussegl communal è da l’opiniun ch’ins duess duvrar la plazza da sport vinavant la stad sco era l’enviern. Il bajetg da las gardarobas na correspundia percunter betg pli als basegns dad oz. I manchia ina pussaivladad da mangiar ed er in salv per ils patins ch’ins po pigliar a tschains, è la conclusiun da la cumissiun dal cussegl communal. La stad passada han trais biros d’architectura da Vaz inoltrà in studi da project anonimisà. Gudagnà quel ha il biro da Michael Hartmann da Zorten. En tut duessan vegnir investids circa sis milliuns francs, tge ch’è trais milliuns e mez dapli che budgetà. Co è quest ferm augment pussaivel? En il messadi argumentescha la vischnanca da Vaz suandantamain: «Ils 2,5 milliuns francs èn mo stads ina stimaziun groppa dals custs. Surtut ils custs per ils indrizs tecnics hajan ins sutvalità massivamain e budgetà bler memia bass.