Raport digl vieadi mundial dad Erica Nicca (4)

Tgeara ligidra a tgear ligider

Suainter egn raschieni cugls meas amitgs australians sund jou sadezidida da viagear anviers l’Australia zentrala, igl Outback australian. Sen la veia ad Alice Springs ve jou fatg staziùn par duas notgs a Coober Pedy. Là sund jou par l’amprem’eada vagnida an la cuvida d’egna temperatura da 43 gros a la sera d’egn urezi c’â sclarieu quella cuntrada spectaculara. Coober Pedy e signieu da las minieras d’opal a da la glieud ca viva an tgeas sutteranas par stgivir las caliras. An las tgeas sutteranas e’gl da stad constàntameing 25 gros tgòld, igl unviern var 20 gros. Jou ve durmieu bagn agl mieus albiert sutteran, cumbagn c’igl para betga gest partgirevel sen la foto. Par andriescher daple sur da que liac faszinànt a sur digl «Kanku-Breakaways Conservation Park» ve jou frequento egn tur d’egn miez gi. Igl Breakaways Conservation Park e egn antschies a possess digls Aboriginals. Igl e egna cuntrada da desiert plagn muts a bots. La cuntrada sarveva ple bòld sco culissa par turnar films da Holliwood, sco p. ex. «Mad Max» cun Tina Turner. (Lieungas noschas pretendan c’igls Americans segian saplatgieus a qua sen la gliegna.) Nus vagn ear survagnieu egna vesta sen la «Dingo fence», la sev da 5600 km lungheztga (!) ca schurmegia las pastiras da nursas da l’Australia digl sidost digls 1885 annà ancunter igls dingos ad igl tgàns salvadis.

Igl tur eara organiso da Jimmy. El e igl ple giuven digls miniers d’opal. Avànt 55 ons e’l imigro cun 18 ons da la Grezia, alura ànc cugl num Dimitrius. El eara suando a sieus frar par ancurir la sia furtuna a Cooper Pedy. Là e’l davanto Jimmy, mo igl grànd tgat d’opal â’l mena gieu la caschùn da far. El lavura da blears ons annà sco guid turistic ad e egn raquintader zund duno – suainter igl tur eassan alura ear sasieus an la bar antoc’ad uras tardas – an la bar sutterana natiralmeing.

Davent dad Alice Springs ve jou fatg part d’egn tur da tschentg gis par ir al Red Center digls gis da Nadal. Que tur mi â mano trànter oter tigl Uluru (Ayers Rock), tigl Kata Tjuta (Olgas), Kings Canyon (egna tgavorgia spectaculara), tigls MacDonnall Ranges (egna gràndiusa cadagna da muntognas) ad an la Rainbow Valley (la valada digl Artg s. Martegn cun furmaziùns da crapa tut speziala). Jou ve giudieu da durmir durànt quater notgs sut igl tschiel stelieu an egn «swag» australian; quegl e egn matraz da rular a satg da durmir a bivacar an egna. La cuntrada agl Red Center e unica a blears liacs en sontgs pigls Aboriginals, igls premabitànts da la teara. Igls visitaders vignan suplitgieus da betg antrar an tschearts antschies ad ear betga da fotografar quels. Nus vagn fatg pliras spassageadas atras quella cuntrada. Par quellas vagnevan nus mintgame svaglieus a las quater da la damàn par stgivir da viandar durànt la calira digl gi. Anqual senda da viandar vean parfegn sarada davent da las 11 da la damàn parquegl c’igl e megna privlus da viandar anavànt parquegl c’igl po vagnir antoca 50 gros tgòld an las valadas.

Spezialmeing bagn mi â plaschieu igl gir atras igl Kings Canyon. Par traversar que tschancùn da seat km lungheztga, igl «Grand Canyon australian», purtava mintgegn da nus tres liters aua cun el c’igl tànschi antoca tigl «Iert dad Eden», egna marvigliusa funtàna d’aua.

Mi faszino â ear igl art digls Aboriginals. Quels maletgs, ca raquentan istorgias, en tgartas geograficas ad expriman sabientschas da veta tut an egna.

Digl tur atras igl Red Canyon â ear fatg part igl Caspar. Caspar e egn Svizer c’eara emigro avànt blears ons an Danemarca noua c’el luvrava sco camiunist. Cun el ad igl sieus fegl ve jou giudieu la mia passiùn danov scuvierta dad ir cun «Road Trains» – igls trens sen las stradas. Tut incantos dumbravan nus alura igl diember da tgars anexs palandos ved egn camiùn cur c’igl bus digl noss tur cruschava egn da quels tils: Igls ple lùngs vevan seglmains quater tgars anexs.

Igl mieus ple lùng vieadi cugl bus mi â mano davent dad Alice Springs anavos ad Adelaide, egn vieadi da 22 uras. Jou sund stada an marveglias co jou vigni a surpurtar quella sfida. La pôssa da miezgi vainsa fatg a «Kulgera» c’e ple u mains igl punct zentral da l’Australia. Igl manischùnz digl bus nus â infurmo sur da la temperatura avànt ca nus eassan sortieus: 50 gros Celsius. Betga da saschmarvagliear ca nus sasevan sco mustgas miez mortas agl bus – la climatisaziùn e betga ple rivada suainter da sfardar! Jou ve survivieu igl vieadi a sund viageada anavànt anviers Melbourne noua ca ve ànc fatg egna davosa excursiùn agl Wilsons Promontory National Park, igl punct ple agl sid da la teara ferma da l’Australia, egna costa cun egna balteztgas cuntrada.

Dantànt sund jou rivada cugl aviùn an la «Teara digl lùng nivel alv», propi a la fegnamira digl mieus vieadi. Igls proxims tres mains vignt jou a viagear atras la Nova Zelandia a salegr da la cumpagneia ord la Svizra!

P.S. Igl mieus liac favurieu e par anqual atgna raschùn Coober Pedy.

Daple fotografeias en da catar sen facebook a sen instagram «Influencererica».

Tgears salids a tut igl bien: Erica Nicca