Ester Vonplon ella Cularta

«Cun il bastiment tras l’Arctica» ei il suttetel dalla proxima exposiziun d’art egl atelier Cularta a Laax. Quella ei dedicada ad ovras dalla fotografa da Castrisch Ester Vonplon. Ester Vonplon ei en siu art adina silla tscherca dils cunfins. Quei vala per si’approximaziun alla fotografia sco era per si’occupaziun intensiva cun loghens solitaris e nunenconuschents.

L’artista Vonplon ha retschiert in stipendi dil program «The Arctic Circle» ch’ha possibilitau ad ella da visitar Spitzbergen ell’Arctica duront la stad 2016 ensemen cun auters artists, scienziai ed activists per igl ambient. Las fotografias da Vonplon regordan a maletgs abstracts. Quellas fotografias analogas 
fan part dalla davosa part d’ina trilogia che tematisescha neiv, glatsch e la colur 
alva.

Quella lavur ei vegnida nominada igl onn 2017 al Rencontre d’Arles per il New Discovery Award ed il Prix Figaro. Vonplon muossa quellas fotografias per l’emprema gada en Svizra. Ins astga haver marveglias tgei che l’artista muossa en si’exposiziun «Wie viel Zeit bleibt der Endlichkeit» ella Cularta a Laax. En collaboraziun cun ils musicists Taylor Deupree & Marcus Fischer ei vegniu ediu 2017 dalla casa editura IIKKI il cudisch e la platta da vinil Lowlands.

Cheu aunc in citat pertuccont las ovras da Vonplon: «Wer karge, ursprüngliche Natur aufsucht, wird von der Ruhe und Erhabenheit gefangen und beginnt, den Blick nach innen zu wenden. Es ist nicht die Landschaft, die Vonplons Bilder einfangen, sondern die davon ausgehende Wirkung…» scriva Dorothea Cremer-Schacht el «Südkurier» a caschun dall’exposiziun el «Museum zu Allerheiligen» a Schaffusa.

L’exposiziun d’Ester Vonplon «Wie viel Zeit bleibt der Endlichkeit» vegn mussada dils 3 tochen ils 24 da fevrer 2019 ella Cularta – atelier e gallaria, a Laax. La vernissascha publica ei sonda, ils 2 da fevrer allas 17.00 ella Cularta.

Yvonne Gienal, menadra Cularta