«Networking» biblic

da Rav. Cornelia Camichel Bromeis 
e Decana da la baselgia evangelica 
refurmada dal Grischun

Pel mumaint ha lö il World Economic Forum, cuortamaing nomnà WEF, a Tavau.

Millis da persunas tscherchan contact üna cun tschella: Id es quella plattafuorma da «networking» chi’d es importanta per ün avegnir da nos muond, sco cha’l inventur dal WEF, Klaus Schwab, ha manziunà in seis pled da bivgnaint. Aint il temp da la globalisaziun 4.0 saja fich important da mantgnair il dialog tanter pêr. Valuors cumünaivlas nu detta plü, valuors moralas stopchan chattar la via ill’economia, aint il muond tecnic e digital per cha’l muond haja insomma ün avegnir. Ils perdents da la globalisaziun as possan uossa nempe defender, il nouvs mezs sozials tils dettan quella pussanza. Ed el ha nomnà sco exaimpel ils «gilets jaunes» in Frantscha chi’d han sviluppà üna tala forza cha lur president, Emmanuel Macron, nun haja pudü gnir a Tavau per far seis «networking» quia.

Il meglder «networker» ch’eu cugnuosch es biblic. Gesu ha savü che chi voul per dar inavant sia mischiun. Seis prüms successurs d’eiran pes-chaders. Els han lavurà cun raits in lur manster. Per els d’eiran quistas raits existenzialas: Lur entradas dependevan dad üna buna praisa. E Gesu tils ha lura clomà sco «pes-chaders d’umans». Els d’eiran dimena ils prüms «networkers». I’l evangeli tenor Marcus haja nom: «E laschand sül mumaint lur raits, al seguitettan els.» (Marcus 1, 18) Els han müdà lur raits da pes-chaders per dvantar part d’üna cumünanza chi tegna plü bain amo co la megldra rait. Perchè cha l’evangeli, la buna nouva, metta l’uman aint il center. L’uman cun seis bsögns. Umans chi’d han drets causa chi’d han tuots üna dignità, richs sco povers, ils uschenomnats debels listessamaing sco’ls ferms. Perquai han els fat «networking« cun Gesu, ed han cuntinuà cun quista clomada davo sia mort. Han quintà inavant la buna nouva. Han pisserà cha l’evangeli da la resüstanza da la mort vaglia per tuot ils umans listess chi voulan crajer landervia. Ils «pes-chaders» da quella vouta han derasà üna rait chi muossa amo hoz sia forza.

Klaus Schwab vezza la necessità d’integrar l’etica e la morala ill’economia dad hoz per avair ün avegnir per nos muond. I’m resta la spranza ch’el haja success cun sia visiun, chi’s possa dir in ün pêr onns ch’el saja stat ün dals buns profets. E ch’el haja gnü las regenzas ed ils pussants da sia vart cun uraglias avertas. E nus sco baselgias til hajan sustgnü cun forzas unidas.