La didactica da la plurilinguitad a 
la SAP grischuna

(gsc) La Scola auta da pedagogia dal Grischun ha communitgà uffizialmain la nominaziun per la professura extraordinaria da didactica integrada da la plurilinguitad. Quella professura dubla pertutga las duas linguas chantunalas rumantsch e talian. Perquai han ins nominà dus docents. Per il rumantsch ha Rico Cathomas survegnì la professura. El era professer da didactica a l’Universitad libra da Bulsaun. Dapi 2016 maina el il project «Mediomatix» (www.mediomatix.ch) da la SAP. I sa tracta d’elavurar meds d’instrucziun da sursilvan, sutsilvan, puter e vallader* per las classas da la segunda a la novavla, cun ina didactica moderna e varianta che feschia «gust a las scolaras ed als scolasts da s’occupar cun lingua cun metter a disposiziun tut il material necessari». Lez material duai esser «cumpatibel cun il Plan d’instrucziun 21 (…) per l’instrucziun en scolas rumantschas idiomaticas.» La professura italofona da didactica da la plurilinguitad survegn Vincenzo Todisco, autur d’ina dissertaziun davart la scola bilingua da Malögia. Dapi 2002 è Todisco docent e collavuratur scientific da la SAP. El ha scrit mezs d’instrucziun, raquints e romans. Nus gratulain cordialmain a Rico Cathomas e Vincenzo Todisco per la nominaziun e giavischain ad els plaina cuntentientscha cun la nova incumbensa.

* Las scolas surmiranas alfabetiseschan per rumantsch grischun.