Collaboraziun cun la HTW Cuera

Da Hans Huonder / anr

Per la quarta ga han ils «dis da discussiun davart la perscrutaziun d’energia» giu liug en claustra a Mustér. 100 scienziai ein separticipai a quels, leutier han ils organisaturs purschiu in arranschament public. Egl avegnir aviseschan igl AlpEnForCe e la HTW Cuera ina pli stretga collaboraziun en quei connex. La primavera 2016 ei la Fundaziun «Center da perscrutaziun d’energia alpin» (AlpEnForCe) vegnida fundada. La finamira da quella ei da promover l’energia regenerabla, en emprema lingia quella che sa vegnir producida ellas Alps. Sin fundament dalla situaziun actuala ed il svilup dall’economia e la politica d’energia eis ei da gronda muntada ch’ils cantuns muntagnards prendien influenza sin la formaziun dalla midada d’energia. Quell’influenza duei buca mo semanifestar politicamein, mobein era enten crear persuenter ina cumpetenza. Ils «dis da discussiun davart la perscrutaziun dall’energia» ch’ein vegni organisai per la quarta ga dils 23 entochen ils 25 da schaner 2019 en claustra a Mustér ein ina part essenziala dalla purschida dalla fundaziun. Duront ils treis dis ei vegniu purschiu al publicum 30 referats, leutier sco gia ils davos onns era in arranschament public. Quel ei staus sut il tetel «Tscheins d’aua – model da success ni impediment?» La finamira da quel ei stada da discutar la situaziun actuala e da cattar soluziuns per in tscheins d’aua supportabel per tuts pertuccai, pia economia d’energia sco vischnauncas da concessiun e cantuns. La Quotidiana ha rapportau detagliadamein en sia ediziun dil gliensdisdis davart ils referats e la discussiun suandonta che pertucca il stan dallas contractivas concernent il tscheins d’aua, respectivamein co quel duess veser ora egl 
avegnir.

In success cumplein

Ils «dis da discussiun davart la perscrutaziun d’energia» digl AlpEnForCe ein stai visitai fetg bein uonn. Tenor il cau dall’organisaziun, il vicepresident e meinafatschenta dalla fundaziun e dil center, Ivo Schillig, ein rodund 100 scienziai separticipai als referats ni allas discussiuns. Ils rodund 30 referats ein stai tuts en connex cun damondas actualas davart l’energia. Sper ils scienziai ein era representants dalla politica, dallas administraziuns publicas e dall’economia dall’energia separticipai als referats e per gronda part era agl arranschament public. El center dallas presentaziuns e discussiuns d’uonn ei la forza hidraulica stada. Ell’ei vegnida tematisada ord plirs puncts da vesta, seigi aspects dalla segirtad dil provediment sco las stentas necessarias pertuccont las investiziuns ni era la schanzas futuras. Denter auter ei la Svizra vegnida cumparegliada cun la Norvegia. En quei connex ein treis referats vegni emess directamein dalla Norvegia a Mustér. «La Fundaziun «Center da perscrutaziun d’energia alpin» ei fetg cuntenza culs resultats dallas conferenzas. In’ulteriura ediziun da quels dis ha liug dils 22 entochen ils 24 da schaner 2020», di Schillig. Sco quei ch’igl organisatur di plinavon preveda igl AlpEnForCe d’intensivar la collaboraziun cun la Scol’aulta per tecnica ed economia HTW Cuera: «Il center e la scola cumpleteschan fetg bein in l’auter. Medemamein ein lur finamiras semegliontas da crear savida e nez pils cantuns da muntogna.» La HTW Cuera ei participada persunalmein vid igl AlpEnForCe dapi sia fundaziun ed als arranschaments dall’jamna vargada eis ella stada in dils partenaris principals.