Toni Steger ha gudignau il turnier da troccas a Sagogn

Ils 25 da schaner 2019 ha igl 8avel turnier da troccas dalla Pro Sagogn giu liug ell’aula dalla casa da scola nova da Sagogn. Sco dapi il 2012 ha Renata Cathomas da Glion tgamunau il turnier. Cun 48 participontas e participonts ha igl organisatur dil turnier, Johann Cantieni, astgau beneventar in niev record da participonts. Igl ei fetg legreivel che biars trochists novs ughegian da separticipar a quei turnier che vegn buca prius aschi serius sco il campiunadi grischun ch’ha giu liug miez schaner a Rabius. Cuntrari al campiunadi grischun nua che mintgamai dus partenaris giogan adina ensemen mida il partenari a Sagogn suenter mintga giug. Quel vegn partius tier cun trer la sort. Aschia drova ei era adina cletg da survegnir in partenari versau. Quei paran ils victurs dil turnier da haver giu. Gudignau ha uonn Toni Steger da Glion avon Linus Deplazes da Rabius. Omisdus han gudignau tut lur scarts. Steger ei il victur damai ch’el ha fatg dapli puncts «buns» che Deplazes. Il tierz rang ha Peter Montalta da Schluein contonschiu. Ils victurs han retschiert in bi diplom creaus dall’artista Yvonne Gienal da Glion specialmein per quei turnier. Quel muossa las quater colurs dallas troccas. Gia il 2018 ein Steger e Montalta stai sil podest, lu ein els denton vegni victorisai dalla giuvna Laura Jemmi da Cuera. Buca tut ils «profis» han giu ton cletg sco ils victurs. Ton la campiunessa grischuna dil 2018, Renata Cathomas (rang 23 a Sagogn), sco il vicecampiun grischun dil 2019, Vitus Dermont (rang 33), han munchentau in plaz davontier. La victura dil 2018, Laura Jemmi, ei vegnida 30avla. Aunc mender eis ei iu cun in auter trochist passiunau, numnadamein cun Paul Marty da Cuera. El ha gudignau gnanc in soli scart ed ei vegnius il davos. Aschia ei il giug da troccas. Quei muossa che novizs ston buca haver tema dad emprender quei giug, era «profis» cuschinan mo cun aua. In noviz ei David Flurin Cabernard da Glion staus, cun 10 onns il pli giuven participont. La Pro Sagogn emprova da mantener la tradiziun da dar troccas mintga vendergis sera allas 20.00 ella sala dalla casa pervenda Cresta a Sagogn.

Tgi ch’ha interess da dar in scart ni d’emprender da dar troccas sa s’annunziar tier Johann Cantieni, mail jj@cantieni.info ni telefon

077 448 01 28.

Luis Poltera, Sagogn

Gliesta da rangaziun

1. Toni Steger 10 puncts, 2. Linus Deplazes 10 puncts, 3. Peter Montalta 8 puncts, 4. Peter Kunfn 8 puncts, 5. Placi Giusep Cadruvi 8 puncts, 6. Ursulina Cavelti 8 puncts, 7. Silvana Riva 8 puncts, 8. Anita Cavegn 7 puncts, 9. Luis Poltera 7 puncts, 10. Orlando Buchmeier 7 puncts, 11. Roman Tschuor 6 puncts, 12. Mario Werth 6 puncts, 13 Mathilda Maissen 6 puncts, 14. Maria Gartmann 6 puncts; 15. Alice Cavelti 6 puncts, 16. Nicolaus Cantieni 6 puncts, 17. Sepp Cadruvi 6 puncts, 18 Silvio Capeder 6 puncts, 19. Maria Brenn 6 puncts, 20. Gion Balzer Casanova 5 puncts, 21. Pia Blumenthal 5 puncts, 22. Cornelia Meyer 5 puncts, 23. Lisabet Caduff 5 puncts, 23. Renata Cathomas 5 puncts, 25. Andreas Hofer 5 puncts, 26. Giusep Collenberg 5 puncts, 27. Michael Cadruvi 4 puncts, 28. Gieri Maissen 4 puncts, 29. Johann Cantieni 4 puncts, 30. Laura Jemmi 4 puncts, 31 Sigisbert Venzin 4 puncts, 32. Helena Diethalme-Beer 4 puncts, 33. Vitus Dermont 4 puncts, 34. Andrea Marty 4 puncts, 34. Anian Camathias 4 puncts, 34. Meinrad Cadruvi 4 puncts, 37. Flurina Cathomas 4 puncts, 38 Claudio Camathias 4 puncts, 39. Fadri Beeli 4 puncts, 40. Casper Deflorin 4 puncts, 41. Daniel Vincenz 3 puncts, 42. Christoph Fausch 2 puncts, 43. Gopma-Luca Vincenz 2 puncts, 44. Teofil Manetsch 2 puncts, 45. David Flurin Cabernard 2 puncts; 46. Ernst Grossweiler 2 puncts. 47. Amanda Beeli 1 punct, 48. Paul Marty 0 puncts.

L’entira gliesta da rangaziun ei sut

www.prosagogn.ch