Entschiet cullas
preparativas

(anr/gv) La sonda vargada ein 25 skiunzs da turas seradunai a Lai Alv. Leu han els seschau informar dils detagls dalla Trofea Péz Ault dils 23 e 24 da mars. Igl ei la dieschavla Trofea Péz Ault e cun quella caschun organisescha il comite d’organisaziun cun Leo Condrau alla testa la cuorsa finala dil Cup mundial da turas da skis. All’instrucziun dils voluntaris a Gendusas ed a Lai Alv ha buc il president giu la direcziun, mobein il caucuorsa. Quei caucuorsa ei Giochen Bearth da Sumvitg. Il veterinari cantunal ha presidiau dudisch onns la Secziun Terri dil Club alpin Svizzer ed ei en quella funcziun era s’engaschaus dall’entschatta enneu en favur d’ina cuorsa da skis da turas.

Funcziunaris fidai

La sonda han ils funcziunaris sco emprem stuiu encorscher che la natira camonda ella muntogna. Muort il ferm vent ha Giochen Bearth stuiu midar il program dalla damaun. «Quei sa tuttavia era esser il cass a caschun da nossas cuorsas il mars», ha Bearth constatau. Ils funcziunaris da tschep – sco il caucuorsa ha puntuau tut funcziunaris fidai cun bia experientscha – han priu enconuschientscha dil niev percuors ed in arbiter dalla federaziun internaziunala ha dau in ni l’auter cussegl. Ils funcziunaris da tschep procuran en emprema lingia per la segirtad dils participonts, ein denton era muossavia e controlla.

L’organisaziun dalla cuorsa finala dil Cup mundial ed il medem mument la 10avla Trofea Péz Ault per curriders populars ei per Bearth ina pulita sfida. «Oravontut sche l’aura fa capriolas.» Als tschun dis da preparaziun e da cuorsa drova Bearth entuorn 80 voluntaris che prestan rodund 200 dis da lavur. «Ils funcziunaris da tschep ein recrutai, sch’in ni l’auter ei promts da segidar en ina ni l’autra funcziun eis el beinvegnius», ha il caucuorsa detg.

In formular d’annunzia ei semtgaus ella pagina d’internet www.trofea.ch