Il zercladur a Glion

(anr/abc) Ina fiasta populara dat ei il zercladur 2019 ella capitala dalla Foppa. La gruppa da lavur «refo500» ei vidlunder da preparar ils detagls dalla scuntrada. Tuttas fracziuns, uniuns, scolas e pleivs ein involvidas. Gia avon in onn haveva la gruppa da lavur «refo500» da Glion puntuau ch’ins vegli buc aunc ina gada commemorar la Reformaziun d’avon 500 onns. Igl ei stau in tierm historic, il svilup ha cuntinuau culla convivenza, la multifariadad. La scuntrada dils 10 tochen ils 22 da zercladur 2019 duei rinforzar ils ligioms ella vischnaunca Ilanz/Glion. Sco quei ch’il president dalla gruppa, ser Jan-Andrea Bernhard, ha puntuau dueigi dar ina scuntrada communala en tuts graus, denter vitgs e marcau, confessiuns e religiuns, uniuns ed habitonts, denter Romontschs e Tudestgs, lu era denter naziuns ed etnias. La Ligia Romontscha ch’ha sia sedia regiunala el marcau vegl da Glion ei ina ferma partenaria dalla gruppa «refo500». Ella vegn a cumbinar sia collaboraziun cun siu agen giubileum «LR 1919–2019». La gronda fiasta populara entscheiva il firau da gliendisgis Tschuncheismas, ils 10 da zercladur ella baselgia da s. Margreta.

pagina 3