«Chattar temp da tgirar ils giasts»

CUN ERNST WYRSCH ha DISCURRì 
GION NUTEGN STGIER / ANR

Oz salva Hotelleriesuisse Grischun a Passugg sia 100avla radunanza da delegads. Dapi il 2013 è Ernst Wyrsch, l’anteriur directur da l’hotel Belvédère a Tavau, president da l’uniun cun 500 commembers.

Vossa bilantscha suenter sis onns president da Hotelleriesuisse Grischun?

Ernst Wyrsch: Ina sfida è segir stà il 2015 da chattar soluziuns per superar la reducziun dal franc svizzer en cumparaziun cun l’euro. Da lez temp è la devisa stada cumbatter empè da lamentar e quai è er vegnì fatg da blers hoteliers. En quels sis onns hai er dà ina midada quai che pertutga la plattafurma per reservaziuns en hotels. Oz è mintga hotel dependent da quels portals sco booking com etc. N’avess in hotel betg ina collavuraziun cun quels portals sa reduciss il dumber da reservaziuns marcant. Ultra da quai ha er l’associaziun dals hoteliers gì da s’engaschar pli fitg en il marketing e lura er tgirar anc pli bain ils contacts tar ils hoteliers. En quels sis onns sco president hai jau visità numeurs hoteliers er per sentir lur giavischs.

Tgenins èn actualmain ils pli gronds quitads dal president da Hotelleriesuisse Grischun?

Da sperar èsi ch’ils hoteliers chattian anc temp da tgirar ils giasts en vista a la digitalisaziun e ch’els hajan temp d’esser a la front en il manaschi e na be en il biro. Da tralaschar il giast sà esser mortal e quai per mintga travagl. En il futur vegn la preschientscha dal hotelier tar il giast ad avair anc dapli muntada.

La stagiun d’enviern 2018/19 ha cumenzà fitg bain cun blers giasts e blera naiv. Co sa preschenta la situaziun per las proximas emnas?

Jau hai survegnì da blers hoteliers resuns positivs. Las proximas emnas èn ils hotels occupads fitg bain e quai en tuttas destinaziuns. Bel è ch’ils giasts svizzers vegnan puspè pli savens en il Grischun e quai er cun in lev augment da pretschs. Ultra da quai turnan cunzunt ils giasts tudestgs, quai ch’è fitg plaschaivel. Da guardar èsi da savair superar las emnas suenter las vacanzas fin Pasca, cun esser quella in pau tard quest onn.

La tendenza da star be pli duas fin trais notgs en in hotel, quella è strusch da franar?

Quella tendenza sa mussa adina dapli e quai er en il Grischun. La raschun è er la mobilitad e lura er la flexibilitad dals giasts. Il gust da viagiar, quel è er tar ils Svizzers vegnì per in pau pli grond ils davos onns. Oz stat in giast strusch in’emna en in hotel, persuenter va el pliras giadas en vacanzas e pi paucs dis.

Nua van lura ils giasts?

Il dumber dals giasts che reservan la chombra dad onn tar onn, quel è bain anc avant maun, dentant en ina pitschna quantitad. Oz ins na po betg sa laschar uschè fitg sin il giast stabel e perquai dovra mintga hotel novs giasts. La gronda concurrenza er per il Grischun èn las citads da l’exteriur. Da sgular per intgins dis a Londra, Vienna, Paris, Dubai e Honkong è oz per sasez. Star ruassaivel, quiet e giudair è ozendi tabu, betg il davos pervia da la mobilitad e da l’entir stress.

Envers noss gronds concurrents 
turistics, il Tirol ed il Tirol dal sid, han ils hoteliers grischuns tut auter che simpel cun er il giast svizzer far savens vacanzas en quellas duas 
regiuns?

Quai che pertutga l’utilisaziun 
tar ils hotels èn quellas duas regiuns 
segir en ina meglra situaziun. Quai che pertutga la valurisaziun persuenter 
betg. Oz han er ils top hotels en quellas duas destinaziuns lur pretschs, dentant la qualitad, quella è en Svizra per in 
pau meglra. Ina raschun che blers 
Svizzers e Tudestgs èn danovamain 
fidaivels a la hotellaria grischuna e renunzian dad ir en il Tirol ubain en 
il Tirol dal sid.

Èn occurrenzas da sport (Tour de Ski, biatlon, Campiunadis mundials da skis, White Turf) d’impurtanza per la hotellaria?

Segir. Quellas èn fitg bunas per l’image da mintga regiun, grazia a quellas vegn fatg attent al giast da visitar il Grischun e cun ina bun’organisaziun è er la reclama fitg gronda. Areguard occurrenzas avain nus in bun maletg.

La cultura e la sanadad?

Omaduas èn da gronda muntada per il turissem e per la hotellaria grischuna. Origen, il Festival da jazz a San Murezzan, emnas culturalas ed autras occurrenzas attiran in grond public e cunzunt er in giast pli bainstant. In grond potenzial avain nus er en il sectur da sanadad cun avair plirs lieus cun in’infrastructura perfetga. Gist ordvart la stagiun èn occurrenzas culturalas ed arranschaments da sanadad da gronda valur per la hotellaria grischuna.

Èsi insumma pussaivel da manar oz in hotel rentabel?

Gea. En il Grischun avain nus buns exempels che quai è realitad. I dovra segir blera lavur seriusa, la tgira dal giast è da grond’impurtanza e lura er la controlla da las finanzas. Impurtant è er da tegnair ils pretschs. Per qualitad, per in bun servis e per gentilezza è il giast anc adina pront da pajar. Gist quels aspects constatan er tar noss hotels e hoteliers.

Èn investiziuns indispensablas?

Cunzunt tar il segment d’hotels da tschintg e quatter stailas, però er tar travagls mesauns, èsi adina da far investiziuns. Gist en vista als blers novs giasts asiats, arabs e da l’India han cunzunt ils hotels da luxus da far investiziuns per esser à jour. Da las investiziuns profitescha savens er l’economia locala e quai è er impurtant.

La stad, quella n’avain nus betg 
anc tematisà. Tge schais Vus da 
quella?

Qua avain nus anc in grond potenzial vers ensi. Ils pretschs, quels èn bain pli bass, dentant il segment da giasts, quel è tuttina bun. L’aura stabila e la natira intacta attiran adina daplis giasts er en nossas destinaziuns da vacanzas e quai vegn er ad esser la stad 2019 uschia.