Scuol ün «hotspot» per l’agir perdürabel

(anr/fa) Myclimate Cause We Care es ün’iniziativa voluntaria i’l turissem cul böt da proteger il clima e s-chaffir sportas dürablas turisticas. La TESSVM chi’d es fingià lönch da la partida survain uossa ulteriurs partenaris. «Myclimate significha cumpensaziun climatica», disch Martina Stadler, la directura da la Turissem Engiadina Scuol Samignun Val Müstair SA (TESSVM), «nossa destinaziun chi ha tut part sco üna da las prümas a quist’iniziativa e cumpensescha las emissiuns da dioxid carbonic (CO2) cha nossa gestiun chaschuna.» Per far quai vegna calculà quant CO2 cha’ls arrandschamaints da la TESSVM chaschunan. Ün exaimpel es il maraton cul velo intuorn il Parc Naziunal Svizzer. Quel es daspö divers ons fingià neutral al clima. «Per cumpensar pajaina üna contribuziun chi vain dovrada per progets a favur dal clima, p. ex. implantaziun da god», declera ella, «uschea lessna procurar cha nos ‘fastizi ecologic’ saja plü pitschen pussibel.» Pro las reservaziuns o cun far adöver d’ün servezzan o sporta turistica pajan ils giasts da la destinaziun üna pitschna contribuziun voluntaria a favur dal clima, «duos fin trais francs». Quel import va illa chascha pella cumpensaziun climatica.

Cun üna contribuziun 
dubel effet

Fin uossa faivan part dal program da myclimate «Cause We Care» sper la destinaziun d’Engiadina Bassa e Val Müstair ils partenaris Albiergs da giuventüna svizzers e la Reka cun lur chasas a Scuol. «Uossa pudaina annunzchar cha no vain chattà trais ulteriurs partenaris», s’allegra Stadler, «i’s tratta dal Bogn Engiadina Scuol, da las Pendicularas Scuol e’ls hotels Belvedere, Belvair e Guardaval.» Ella manzuna amo üna jada la contribuziun voluntaria: Ch’üna part da quella contribuziun gnia ütilisada per progets a favur dal clima illa regiun da la destinaziun cumünaivla, precisescha la turisticra. Quai nun es, sco ch’ella accentuescha, amo tuot: «Il special da myclimate Cause We Care es cha no da la destinaziun pajain aint il medem import sco il giast. Scha quel paja duos francs fain eir no quai, e quists mezs finanzials stan lura a disposiziun eir per s’ingaschar per ün svilup perdürabel da las regiuns Engiadina Bassa e Val Müstair.»

Cun promouver eir il trafic public

Culs mezs finanzials chi sun avant man ha la TESSVM la pussibiltà da realisar masüras e progets regiunals a favur dal clima. Pel mumaint es l’organisaziun illa fasa da ramassar ideas ed elavurar concepts per da quists progets.

Ün pudess esser da spordscher üna staziun per e-bikes pels giasts gratuita, ün oter da s-chaffir masüras chi sensibiliseschan ed activeschan a classas da scoula a favur dal clima. «No mantgnain ed optimain però eir sportas e masüras existentas», accentuescha Stadler e manzuna sco exaimpel üna sporta cha seis antecessur Urs Wohler vaiva inzià, il «trafic public inclusiv»: «Per cha plü blers giasts pussibel fetschan adöver dal trafic public per rivar pro no, e schanieschan uschea il clima, procuraina pel transport dal bagagl da la staziun fin i’l hotel ed eir illas singulas abitaziuns da vacanzas.» Ingon ha la destinaziun optimà amo quista sporta: «Scha’ls giasts giavüschan vegnan collavuratuors da las VFF pel bagagl pro els a chasa, il di davo es tuot in lur hotel o abitaziun da vacanzas.»

Quai es, sco ch’ella agiundscha, ün proget pilot cumünaivel da las VFF e da Svizra Turissem.