Adia a miu cumpogn da troccas

Tard, fetg tard, hai jeu giu la quida d’emprender d’enconuscher Otmar Caduff. El veva schon vargau ils 90 (!) e veva aunc adina ina memoria sco in da 20. Empriu d’enconuscher hai jeu igl Otmar entras il Club da troccas da Domat. Dar cun el troccas sco partenari fuva in deletg, dar encunter el pretendeva in bien inschign. Otmar Caduff, oriunds dalla Val Lumnezia e carschius si a Mustér, veva in fin humor ed in grond cor per ses conhumans.

El cuort temps ch’jeu hai astgau accumpignar igl Otmar ils davos onns da sia veta sundel jeu, cun mias marveglias sco schurnalist, vegnius sissu dad el ina massa caussas interessantas. Per exempel ch’el hagi giu onns intensivs il temps dalla conjunctur’aulta tier siu patrun dalla Viafier retica e ch’el vessi mai tertgau ch’el vegni inaga aschi vegls.

Avon in onn ha Otmar Caduff annunziau da desister al giug da troccas, el sesenti mentalmain buca diltut segirs, quei ch’hagi da raschun da far zatgei cun sia vegliadetgna, ha el detg cun in tun malizius. Jeu hai aunc giu caschun da visitar zacontas gadas igl Otmar a casia a Domat ed haver cun el e sia dunna Helen buns discuors. Cuort avon Nadal ha nies bien Otmar bandunau il terrester cun 93 onns. El ei sedurmentaus pascheivlamein a casa.

Car Otmar, jeu ed era il Club da troccas da Domat vegnin a tener tei en buna memoria.Flavio Huonder, Domat