Scamonds e lubientschas

(anr/abc) La vischnaunca Lumnezia ei vidlunder da reglar in fatg che caschuna discussiuns, cunzun igl unviern. La populaziun duei s’endisar vid in clar uorden da parcar. Sis onns suenter la fusiun dallas anteriuras vischnauncas dalla Lumnezia ha la suprastonza communala priu a mauns ina caussa che fuva clara, denton buca sin pupi e buca cun decret ufficial. Igl onn vargau ha la suprastonza communala denton stuiu vegnir activa, oravontut pervia digl unviern cun bia neiv e skiunzs. In dils pensums principals dalla vischnaunca eis ei da far ora neiv e tener liber vias e parcadis publics. Autos parcai duront jamnas sin terren public impedevan da far quei. Il reglament duei entrar definitivamein en vigur sill’entschatta december 2019.Senza procedura ufficiala ei quei buca pusseivel.

pagina 5