Introdüt l’üna e l’otra innovaziun

DAD ANNATINA FILLI / ANR

Per la 44avla jada ha lö in dumengia la cuorsa da passlung chi maina da Martina a Scuol. Ils organisatuors fan quint cun 150 passlunghistas e passlunghists. Minch’on, la seguonda dumengia da favrer, ha lö la cuorsa da passlung da Martina a Scuol. La cuorsa tradiziunala da passlung in stil liber e classic masüra quist on 23 kilometers. La partenza es a las 10.30 a Martina. I’s tratta d’üna cuorsa populara chi’d es partida in diversas categorias. Davo la cuorsa ha lö pro’l böt a Serras-Runà a Scuol amo ün cross da skis pels uffants.

Ün kilometer daplü a Martina

Tradiziunalmaing in favrer vain realisà il Passlung Martina–Scuol ed ingon fingià per la 44avla jada. La cuorsa vain eir nomnada la «pitschna engiadinaisa» ed es ün’ideala preparaziun pel Maraton da skis engiadinais. Il traget maina lung l’En, tras gods e pas-chüras libras. «A Martina han d’absolver las curriduras e’ls curriduors nouv ün’anza da bundant ün kilometer avant co chi va lung l’En vers Scuol», manzuna Jachen Bass, il president dal comitè d’organisazun. Cun quista innovaziun speran ils organisatuors da pudair evitar il battibuogl d’atletas e d’atlets pro la strettüra da Strada. Nouv as rechatta quist on il post da proviantaziun a Pradella e na plü a Ramosch. Ün’ulteriura innovaziun cha’l nouv comitè d’organisaziun ha introdüt es la registraziun online e la masüraziun dal temp chi sun gnüdas surdattas a la Datasport SA. «S’inclegia cha quist’innovaziun procura per daplü cuosts, ma percunter pudaina spordscher daplü professiunalità in quist sectur da la cuorsa», es Bass persvas.

«Il traget es in ün bun stadi»

Grazcha a la blera naiv as preschainta il traget dal 44avel Passlung Martina–Scuol in ün bun stadi. «Tuot es pront e be in singuls lös staina cuort avant la cuorsa metter aint naiv», manzuna il president dal comitè d’organisaziun. Duos da quels lös as rechattan üna vouta pro la chava da glera in vicinanza da Ramosch e’l seguond lö pro la punt a Sur En da Sent. «La punt vain serrada pel mumaint da la cuorsa per tuot il trafic motorisà ed in quel mumaint vain cumplettada quista part dal traget cun naiv e culs stizis bsögnaivels», declera Bass. Als vendschaders da la cuorsa spettan premis in fuorma da munaida. Per render plü attractiv l’arrandschamaint sportiv sun ils organisatuors amo in tschercha da l’ün o l’oter passlunghist professiunal. «Quist on esa plüchöntsch difficil da tils chattar», manzuna’l. Tenor Bass as rechattan blers d’els, uossa cuort avant las Maestranzas mundialas da passlung a Seefeld, in ün bloc da trenamaint. Per la cuorsa da prosma dumengia spettan ils organisatuors fin a 150 partecipantas e partecipants. «La gronda part d’els deriva da l’Engiadina, da Livigno, da l’Italia e dal Tirol.»

Cun ün nouv comitè 
d’organisaziun

Il prüm Passlung Martina–Scuol ha gnü lö als 15 favrer 1976 e quai sün ün traget da 25 kilometers. Scha las relaziuns da naiv d’eiran bunas es gnüda organisada la cuorsa minch’on. Dürant blers ons seguiva il traget al cuors da l’aua da l’En, dimena da Scuol a Martina. L’on passà s’ha fuormà ün nouv comitè d’organisaziun cun Bass sco president. Per l’administraziun sun Marianne Werro e Tinetta Strimer respunsablas, Andrea Florinett es respunsabel per las finanzas e Riccardo Nesa es il man dret dal president. Daspö ün pêr ons es Michel Rauch respunsabel pel traget e collavura insembel cun Mario Denoth, il coordinatur per la loipa da Scuol a Martina. Il skicross pels uffants vain organisà da Jon Andri Willy. «Per finanziar nos arrandschamaint vain nus cullas Ouvras Electricas d’Engiadina il uschenomnà ‘presenting sponsor’, cun mia Engiadina, il Club da Touring – Campadi Scuol e Grischun Sport trais sponsurs principals e lura amo divers donatuors da la regiun», conclüda Bass.

La 44avla cuorsa da passlung Martina–Scuol ha lö in dumengia, ils 10 favrer cun partenza a las 10.30 a Martina. Ulteriuras infuormaziuns e’l formular per s’annunzchar online as chatta sülla pagina d’internet www.passlung.ch