Prest tons catolics sco 
protestants e senza confessiun

(cp) Tenor las cefras ch’igl Uffeci federal da statistica ha gest communicau per 2017 dat ei en Svizra tudestga numericamein prest tons catolics sco protestants e senza confessiun. Tier ils catolics ei il diember denton in tec pli aults en consequenza dalla migraziun. 1,6 milliuns ein catolics tier ina populaziun da tschun milliuns persunas en Svizra tudestga, 1,4 milliuns protestants ed 1,2 milliuns senza confessiun. Gronda ei la differenza visavi las autras cuminonzas cristianas ed islamas cun mintgamai 0,3 milliuns commembers. La cuminonza giudaica ha 11 000 commembers.

En Svizra latina

En Svizra franzosa, nua che 1,7 milliuns habiteschan, ein ils evangelics-reformai cun 260 000 commembers lunsch anavos als catolics cun 670 000 commembers, suandai dils 530 000 senza confessiun. – Ella Svizra taliana ein ils catolics cun 205 000 da 310 000 habitonts, che vivan leu, ella clara maioritad. Ella part taliana han ins registrau 63 000 senza confessiun. – Il diember dils catolics e senza confessiun cun derivonza digl exteriur vegn a crescher.

Grondas midadas dapi 1970

Il svilup different tier las duas grondas confessiuns en Svizra semuossa era tier l’appartenenza allas confessiuns. 1970 eran bunamein 50% dalla populaziun svizra protestants. Igl onn 2000 fuva ei aunc 34% ed oz strusch 24%. La cumpart dils catolics ei ida meins anavos en quei interval – en consequenza dall’impatriaziun – da 47% sin 36%. Oz ein pia 36% dils Svizzers catolics e 24% protestants.

Varga ina quarta ei senza confessiun

Il pli fetg ei il diember dils senza confessiun carschius en quei interval, numnadamein dad 1% sin 27%. Varga ina quarta dils Svizzers ei oz senza confessiun. La cuminonza dils muslims ei carschida en quels prest 50 onns da 0,2 sin 5,4%, ferton ch’ils Gedius ein restai constants cun 0,3%.