Cun sustegn da tuot la regiun

DAD ANNATINA FILLI / ANR

La Coppa mundiala FIS da snowboard riva per la seguonda jada in Engiadina Bassa. Eir il matadur local Nevin Galmarini sarà ingon da la partida. Davo il success da l’on passà tuorna la Coppa mundiala FIS da snowboard darcheu i’l territori da skis Motta Naluns a Scuol. Ils organisatuors han pudü ramassar experienzas a chaschun da las Maestranzas svizras e da la Coppa europeica chi vaivan gnü lö avant ün pêr ons al medem lö. Da la partida saran bundant 100 atletas ed atlets, tanter dad els eir ils vendschaders e’ls partecipants da las Maestranzas mundialas FIS a Park City illa disciplina snowboard alpin. «Sper l’indigen Nevin Galmarini d’Ardez sarà eir la vendschadra da Park City, Julie Zogg, a la partenza», disch Martina Hänzi, la presidenta dal comitè d’organisaziun.

Lung viadi fin al final

Il böt da mincha atleta e da mincha atlet chi’s partecipescha a la Coppa mundiala FIS snowboard es da finir la stagiun sco victur final. Dürant la stagiun vala per minchün da ramassar pro tuot las cuorsas uschè blers puncts sco pussibel. La Coppa mundiala consista da las duos disciplinas slalom parallel e slalom gigantesc parallel. Il slalom gigantesc spordscha daplü attracziun pel public, qua cha pel solit daja cuorsas plainas da tensiun. Al cumanzamaint ston absolver las curriduras e’ls curriduors ün gir da qualificaziun. Las 16 plü sveltas atletas e’ls 16 plü svelts atlets da quista qualificaziun as masüran in seguit directamaing l’ün cunter l’oter. Tuots duos curriduors han d’absolver tuots duos parcours e’l plü svelt riva üna runda inavant. A la fin as masüran lura ils duos ils plü svelts i’l final cun ün duel direct. Eir ingon han lö las cuorsas per la Coppa mundiala sülla pista da Prui. Quista es avuonda largia e plünavant eir bain ragiundschibla pels aspettatuors chi rivan a pè i’l territori da skis. Tenor ils organisatuors as riva al lö o culla s-chabellera da Ftan o lura da Scuol sü culla pendiculara e cun üna spassegiada da bundant üna mezz’ura da Schlivera a Prui. «Nus sperain cha blera glieud gnia a verer la cuorsa, quai eir pervi cha quista disciplina es per tuots fich interessanta», manzuna Hänzi.

Cun l’agüd da voluntaris

Per realisar la cuorsa a chaschun da la Coppa mundiala FIS sun ils organisatuors in tschercha da voluntaris. Qua cha la FIS fa tschertas prescripziuns sun ils ingaschamaints per las agüdontas e’ls agüdonts plü multifaris sco üsità. Uschè daja la pussibiltà da güdar a fabrichar sü tuot l’infrastructura da sgürezza o la tecnica per l’emittur da televisiun. L’emittur «Teleclub Zoom» porta live ils purtrets da la cuorsa oura in tuot il muond. «Eir la Televisiun Svizra ha planisà pel di da la cuorsa ün’emischiun davent da Scuol», uschè Hänzi. Plünavant daja la pussibiltà da s’ingaschar voluntariamaing sco guardgiaportas o lura da güdar a preparar e da mantgnair la pista. «Nus dovrain l’agüd da passa 150 voluntaris e sperain cha l’ün o l’oter s’annunzcha amo», disch la presidenta. Finanzialmaing vain l’arrandschamaint sustgnü da las Pendicularas Scuol SA, dal cumün da Scuol, da la Turissem Engiadina Scuol Samignun Val Müstair SA e dal chantun Grischun. «Ingon faina quint cun ün büdschet da bundant 300 000 francs e grazcha al sustegn dals sponsurs da tuot la regiun esa pussibel da realisar quist arrandschamaint», manzuna Hänzi.

Las cuorsas per la qualificaziun cumainzan in sonda, 9 marz a las 09.30 sülla pista da Prui sur Ftan. Il final cumainza lura a las 13.30 e la rangaziun ha lö güsta davo las cuorsas i’l territori dal böt.

Ulteriuras infuormaziuns e l’annunzcha pels voluntaris as chatta sülla pagina d’internet www.scuol-zernez.engadin.com