71 ein semesirai a La Péra

(anr/hh) La dumengia vargada ei la cuorsa da skis annuala da Trun vegnida organisada sin la pista da La Péra. 71 skiunzas e skiunzs – pigns e gronds – ein semesirai d’excellentas relaziuns da pista. Las victuras ed ils victurs dallas otg categorias han gudignau ils buccals en fuorma d’in pér, sponsurai dalla Scrinaria Daniel Maissen. Ils seniors dil Club da ballapei Trun-Rabius han enrihiu la sentupada cun ina grillada. Il menaschi da skis a Trun gauda danovamein in unviern cun bia neiv. Gia igl unviern vargau ein las relaziuns stadas fetg bunas a La Péra, quei ch’ei buc adina stau il cass ils davos onns e decennis. La societad acziunara Runal Péra a Trun ch’ei la possessura dils indrezs e che procura il menaschi e la pista ei vegnida fundada 1970 cun la finamira da construir, menar e mantener in runal en favur dil sport cun skis per indigens e hosps da vacanzas.

En special han ils iniziants vuliu scaffir ina purschida per affons da scola, entscheviders sco era persunas pli veglias ed aschia procurar per in’atmosfera familiara a Campliun. Ch’igl ei reussiu da mantener e promover quella purschida entochen oz ei d’engraziar allas frequenzas da buns unviarns, mo lu era surtut a biars gidonters e donaturs. La liunga gliesta da sponsurs sin la homepage dalla societad dat perdetga dil sustegn fideivel. Sco quei ch’ins sa seperschuader ei la finamira dils iniziants da lu e dallas persunas ch’ein s’engaschadas e che s’engaschan aunc oz pil menaschi contonschidas cumpleinamein.