Igls sarvetschs èn multifars

Radis suglegl scleran aint dalla fanestra digl biro dall’Uniun da spitex Alvra/Churwalden tgi è ainten igl bietg dalla tgesa d’attempos Parc a Planeiras. Ve digls pults tschaintan Jeannette Geiges e Hanspeter van der Rijst, fatschantos cun lour lavour. Els èn igls responsabels digls sarvetschs per la regiun Alvra e Churwalden. Fon plans da lavour, discurs da basigns d’ageid ed els èn igls responsabels tgi magnan igl team da lour regiun. La terza responsabla è Janine Genous tgi è responsabla per la regiun da Surses. Scu substituta geida Jannine Cavelti a tots treis responsabels. Adegna puspe scaligna igl telefon, i marscha bler.

Anna-Emilia Hemmi tschainta ve digl pult aint igl biro dasperas, en cuppegn café davant ella. «Mintgatant ègl bagn enpo hectic», sa perstgisa ella e varda segl display digl telefon tgi para da scalinar an en cuntign. Ella è la magnafatschenta e sias lavours èn multifaras. Las lavours tanschan dalla contabilitad, rendachints da paia, recrutaziun da persunal anfignen tar statisticas pigl cantun e substituziuns digls responsabels. «Ia va pero er da far mintgatant discurs da basigns d’ageid», declera ella. Tar chels discurs vogl per vurdar tge tgi igl cliaint dovra, ageid da tgira ni sarvetschs, e cant savens tgi el dovra igl ageid. Èn sclareidas tot las dumondas, alloura so neir scretga l’incumbensa d’angaschamaint.

Mintgign dovra en oter ageid

L’Uniun da spitex Alva/Churwalden è neida fundada igl 1. da schaner 1994. Sa furmada è ella or dalla tgira da tgesa Alvra e dall’uniun tgira da tgesa cres Churwalden. La suprastanza sa cumpona igl mument digl president Ralf Kollegger (Malix), Daniel Albertin (Mon), Brigitte Held (Malix), Ursina Solèr (Savognin), Sandra Luzio (Savognin), Dominik Schäfer (Valbella) e Gabriela Ulber (Lantsch). Davent digl matg vign Thomas Parpan a surpiglier igl post da Dominik Schäfer. Igl amprem president dall’Uniun da spitex Alvra/Churwalden è sto Gaudenz Willi. Actuar è sto Johann Gruber tgi è ossa canzlist digl cumegn da Vaz. Siva digl 1. da schaner 2014 è Anna-Emilia Hemmi magnafatschenta. Ella è stada digl 2006 anfignen igl 2013 responsabla digls sarvetschs. Pigl mument èn amplueidas 29 persungas tar l’uniun dalla spitex. «Nossas collaboratouras èn aglmanc gidantras da tgira cun scolaziun dalla Crousch cotschna», declera la magnafatschenta. L’uniun da spitex ò pero er tgirunzas da malsangs amprendeidas tgi corvan igls basigns dall’antiera regiun. L’uniun da spitex ò igl mument a disposiziun otg autos tgi èn repartias sur l’antiera regiun. «Igl onn passo on noss collaboratours fatg radond 180 000 km per igls noss cliaints», dei Hemmi. Sarvetschs tgi geidan tgi persungas pi viglias son star pi dei ainten lour tgesas. Igls sarvetschs dalla spitex cumpeglian pero betg angal sarvetschs tar persungas pi viglias. La spitex geida er an cass da malsognas, discletgs, malsognas psichicas ni oters impedimaints. Sper la lavour da tgira vignan er surpigleidas lavours aint igl tigneirtgesa, p. ex. cumprar aint ni puzzager. «Nous faschagn tot las lavours da mintga de. Ena puzzageda dalla premaveira, l’ezza surpigliainsa pero betg», punctuescha Hemmi. Antras la sia lavour geida la spitex er agls confamiliars. Tar la tgira vign disfranztgea tranter la tgira fundamentala e la tgira da tractamaint medicinala. I vign er purschia antras ena tgirunza digl rom ena tgira psychiatrica ed en sustign per igl mintgade da cliants an situaziuns da crisa ni cliants tgi èn stos ainten ena clinica. Er la tgira palliativa survign adegna daple muntada. Uscheia pon igls muribunds star anfignen la fegn ainten lour quatter pareis ed igls confamiliars son neir sustignias.

Er gidanters voluntaris

La finanzaziun dalla tgira, igl sclarimaint e la cunsegliaziun vignan surpiglias dalla cassa da malsangs. Sarvetschs ainten tgesa ston pero neir finanztgias sez, chegl vala er per igl sarvetsch digls giantars. Tar chel sarvetsch vign purto, antras voluntaris, eneda an de en past tgod. «Per chest sarvetsch ischans adegna sen la tschertga dad automobilists voluntaris», uscheia la magnafatschenta, «surtot per igl territori da Planeiras».

Per la scolaziun digls collaboratours vign fatg mintg’onn regularmaintg scolaziuns cugls temas violenza, communicaziun ni reanimaziun. «Per la tgira digl team faschainsa mintg’onn en’excursiun cugl persunal, tschagnas ed activitads scu p. ex. eir cun stadal», rachinta Hemmi. «Las donnas lavouran bagn scu team, pero è tuttegna mintgigna suletta. La lavour communabla sa basa sen gronda fidanza.» Ena fidanza tgi è sa cumprovada gio 25 onns.Nicole Trucksess

translaziun Mc