Biars affons selegrassen dil pass

dad augustin beeli / anr

La stad 2019 fuss el puspei, e tschiens affons da siat vischnauncas savessen guder el: Il pass da vacanzas dalla Pro Juventute. La purschida ei periclitada, pertgei igl appel dil comite d’organisaziun ha buca resuns, negin vul segidar. Biars affons selegran mintgamai dil pass da vacanzas ch’il District Foppa dalla Pro Juventute porscha. Quel sedrezza mintga dus onns ad affons ch’ein buc en vacanzas, ch’ein returnai da quellas, che van aunc ni ch’astgan guder ina ni l’autra aventura ella regiun. Il pass da vacanzas porscha recreaziun, pintgas aventuras e cumpignia. Separticipar san affons dallas vischnauncas Ilanz/Glion, Sursaissa Mundaun, Val, Stussavgia, Falera, Laax, Sagogn e Schluein.

Negin ha reagau

Da quellas vischnauncas duess era la squadra dil comite d’organisaziun derivar. Cornelia Schmid-Cadalbert da Glion ha publicau las davosas jamnas el Fegl ufficial in appel urgent. Ella enquera persunas ch’ein interessadas – sco ella sezza – ch’il pass da vacanzas existi vinavon pils affons dalla regiun. Per segidar duvrass ei quater tochen tschun novs commembers ella squadra d’organisaziun. «Ei fuss fetg donn sch’ei dess la stad 2019 negin pass da vacanzas per Glion e contuorn mo per munconza da commembers dil comite», scriva Cornelia egl appel e finescha quel cugl avis: «La lavur sepaga.»

Las reacziuns ch’ella ha survegniu las treis jamnas vargadas silla communicaziun fan surstar. Buc ina suletta persuna ei s’interessada, nungir s’annunziada. Las scolas havevan retschiert igl appel e dau vinavon il fegl sgulont als geniturs. Tschiens geniturs ellas siat vischnauncas han saviu leger dil problem da recrutar persunal pil comite dil pass da vacanzas. Negin ha reagau. En in discuors cull’anr conceda Cornelia ch’ella seigi tuttavia surstada ed era trumpada. La finala seigi igl engaschi limitaus sin in cuort temps, ei seigi denton ina lavur classica da voluntaris. La paga ch’ins survegn ei ina tscheina da cumpignia suenter ch’il pass da vacanzas ei terminaus.

30 pusseivladads per 30 francs

El team dil pass da vacanzas lavuran ins maun en maun, ei dat negin presidi, ils ressorts vegnan reparti tenor cunvegnientscha e risguard. La lavur pli intensiva ei quella d’administrar la pagina d’internet, da rimnar las annunzias e tener il contact cullas famiglias. Schmid spera vinavon d’anflar quater tochen tschun persunas. «Sur igl entir onn dat ei buca bia da far», gi ella. Actualmein fussi ei da semtgar il program. Gliez ei ina lavur creativa dil team, ins astga eleger e selecziunar aventuras specialas per la stad 2019. Las purschidas ch’ils affons favoriseschan ein per exempel riverrafting sil Rein, diversas disciplinas da sport, observar selvaschina, ir cul cajac sil lag da Laax, far paun e pizza, cuors da malegiar, kino d’affons ni lavar aur el Rein. E cun zambergiar ni cuschinar semeglia ei era adina cuort ad affons da sis tochen 16 onns.

Il davos pass da vacanzas dil District Glion e contuorn dalla stad 2017 ha purschiu duront treis jamnas 30 pusseivladads per 30 francs. La purschida ei pusseivla cun agid da sponsurs. Encurir il contact cun lezs s’auda medemamein tier la lavur creativa e communicativa dil team. Il pass dalla Pro Juventute includa igl abonnament general pil traffic public, quel vala pigl entir temps da stad. Cu entschevess il pass da vacanzas 2019? Sco Schmid explichescha savess il team niev aunc definir quei exact. Ideal seigien las empremas jamnas dallas vacanzas, aschunta ella. La gronda paga ch’ella sezza survegn per siu engaschi ei quella dils egls tarlischonts d’affons cuntents. Biars onns han Valentina Montalta e Susanne Hafner da Glion menau ed organisau il pass da vacanzas. Era ellas san confirmar quei, aunc onns pli tard seregordan ils giuvens carschi d’excursiuns, visetas ed enquala aventura cul pass da vacanzas dalla Pro Juventute. La stad 2017 han 145 affons gudiu las purschidas. Per garantir la cuntinuitad duvrass ei ussa tschun tochen sis carschi. Ei fuss in pensum engrazieivel e cun senn, buc il davos per exempel per giuvnas tattas e giuvens tats.

Entochen la fin da fevrer enquera Cornelia Schmid 4–5 commembers pil comite d’organisaziun, plidentai ein secapescha dunnas ed umens, babs e mummas. Tgi che vul contactar la responsabla dil pass da vacanzas Glion e contuorn duei tarmetter in mail all’adressa fepa.ilanz@gmail.com