Candidats per 
las tschernas da Chalandamarz

(anr/afi) La radunanza cumünala da Zuoz d’eira in prüma lingia necessaria per preparar las tschernas da Chalandamarz. Preschaints d’eiran 39 votantas e votants. Pel cussagl cumünal as metta a disposiziun Romeo Cusini per ün’ulteriura perioda d’uffizi da trais ons. Gian Rudolf Caprez ha ragiunt davo nouv ons la limitaziun da temp per sia carica e perquai faja dabsögn d’eleger ün nouv cusglier cumünal. Plünavant sto gnir rimplazzà Thomas Pinggera. El es gnü tschernü sco nouv manader tecnic dal cumün ed ha cun quai stuvü bandunar il cussagl cumünal pel cumanzamaint dal mais december da l’on passà. Our dal ravuogl da la radunanza cumünala sun gnüts proponüts Ladina Tarnuzzer e Luis A. Wieser pels duos posts vacants. Christian Klainguti, cumischiun da fabrica, e Gian Reto Rainalter, cumischiun sindicatoria, as mettan a disposiziun per ün’ulteriura perioda d’uffizi da trais ons. La radunanza cumünala ha approvà ün credit da 550 000 francs per la sanaziun da la Foura Chanels i’l center dal cumün.