Denter tradiziun e moderna

Da Hans Huonder / anr

In studi susteniu dil Fond naziunal svizzer muossa ch’il maletg da famiglia tradiziunal ei aunc adina actuals tiels carstgauns giuvens. La cumbinaziun da veta professiunala e famiglia ei denton ina gronda sfida. Pli baul era il bab quel che procurava ils mieds finanzials necessaris per surviver dalla famiglia e la mumma era quella che fageva il tenercasa. La rolla enteifer la famiglia era definida claramein, la mumma era medemamein quella che sefatschentava primarmein dils affons. Quei ei semidau ils davos onns, oravontut era cugl engaschament professiunal dalla dunna. Tonaton ei quei maletg tradiziunal dalla famiglia aunc adina els tgaus dils carstgauns giuvens. Quei demuossa in studi fatgs dil Center Gender Studies dall’Universitad da Basilea cun sustegn finanzial dil Fond naziunal svizzer. En intervistas qualitativas cun 48 persunas ella vegliadetgna dall’entschatta da 30 onns ei la rolla da famiglia e dalla professiun vegnida tematisada. Pils umens dumandai eis ei clar ch’els procuran per l’existenza dalla famiglia quei mument ch’els han affons. Las dunnas perencunter ein dil meini ch’ils umens dueien procurar era egl avegnir per las cundiziuns existenzialas dalla famiglia. Per ellas gioga la professiun in’impurtonta rolla era duront il temps da famiglia cun affons.

Pagina 3