Novs Cafés rumantschs 
en Surselva

(cp) La Lia Rumantscha ha instradà novs Cafés rumantschs a Sevgein e Vuorz. Er a Mustér e Laax datti interess per tals inscunters regulars tranter indigens e persunas novarrivadas. Dapi bundant set onns datti gia ils Cafés rumantschs en Surmeir ed en Engiadina Bassa. En Surselva devi fin qua sulettamain il «Café romontsch» en Lumnezia, organisà regularmain da la Fundaziun da cultura Lumnezia. Il biro regiunal da la Lia Rumantscha a Glion ha uss instradà dus novs Cafés rumantschs. L’emprima entupada a Sevgein ha lieu mesemna, ils 27 da favrer 2019 en l’ustaria Cauma pintga e vegn organisada cuminaivlamain da la magistra Iris Cadalbert e da la promotura regiunala da la Lia Rumantscha Alice Bertogg. Glindesdi, ils 4 da mars 2019 datti l’emprim Café rumantsch a Vuorz en l’hotel Ucliva. Envidada sco giast è l’indigena Andrea Veraguth ch’instruescha rumantsch a las scolas primaras da Castrisch e Ruschein. Il tema da l’inscunter è il rumantsch en scola e las cumpetenzas rumantschas dals uffants ozendi.

I dat dentant er interess d’instradar Cafés rumantschs en auters lieus en Surselva. A Mustér èn las preparativas gia uschè avanzadas che l’emprima scuntrada duess avair lieu questa primavaira. Er a Laax è l’interess avant maun per Cafés rumantschs. L’Uniun da dunnas da Laax tschertga en collavuraziun cun la Lia Rumantscha ina persuna che maina las scuntradas.

Ils Cafés rumantschs porschan la pussaivladad da discurrer regularmain rumantsch. Persunas novarrivadas cun enconuschientschas da basa dal rumantsch pon sa barattar cun indigens. Ellas vegnan uschia integradas meglier en il vitg e recepidas sco persunas che discurran rumantsch. Mintg’entupada ha in tema, magari vegn er envidà in giast. Las manadras ed ils manaders dals Cafés rumantschs dattan ina structura, l’inscunter n’è dentant betg in curs da rumantsch.

Survista:

– Café rumantsch a Sevgein: mesemna, ils 27 da favrer 2019 a partir da las 19.00 en l’ustaria Cauma pintga a Sevgein

– Café rumantsch a Vuorz: glindesdi, ils 4 da mars 2019 a partir da las 20.15 en l’hotel Ucliva a Vuorz

– Café rumantsch a Lumbrein: mardi, ils 12 da mars 2019 a partir da las 19.30 en la Casa d’Angel a Lumbrein