Cun ena nova uniforma pronts per igl giubileum

(pb) La musica da tschever Fetters Sursetters ò gio gia l’egn u l’oter antop. Uffizialmaintg ainten la regiun antschevigl pero alla fegn da chest’emda cun igl til d’unfants a Savognin ed alloura la sonda seira a Riom. Gl’è chest onn 20 onns siva tgi la gugga è neida fundada. Ena festa da giubileum dattigl pero pir dalla scuntrada naziunala dallas guggas igls 16/17 da mars 2019. Igl amprem resvegl digl tschever on igls Fetters Sursetters gio gia igl mez schaner. Lò èn els stos sen visita ainten la Valragn sangalesa ad Altstätten tar igls Moosfürz, ena gugga cun la quala els on gio ena lunga amiceztga. Ed alloura sonda passada è stada en’amprema scuntrada da guggas agl Grischun, numnadamaintg igl Schamaroper-Poper. En bal da tschever a Coira.

Siva treis onns ègl do chest onn ena midada digl costum. «Chegl è uscheia igl turnus regular per ena midada. Ma chest onn erigl cler tgi vess da dar ensatge nov per igl giubileum da 20 onns», dei Flavio Guetg, igl capo-guggist.

Chest onn ènigl betg da surveir

Igl domber digls musicants dalla gugga è resto scu igls onns avant tar 25. Ensatge mutaziuns ègl do. Magari ensatgi tgi è sortia ed oters èn antros. Dad aveir ena uniforma per 25 persungas è tuttegna anc ena sfida. Er finanziala. I vegian duvro ca. 8000 francs, els vignan sustignias da sponsors. Ena sfida ègl pero er per la fantascheia: Tge duess esser igl motiv per igl nov costum? Betg schi simpel!

Chel tgi ins ò gia igls davos treis onns era dallas calours annò cun chel lev blo ed ensatge neir ed alv e las capuzas cun ve las cornas dètg modest. Aint igl passo era Melanie Poltera, la schnidregna da Riom, chella tgi gidava concepeir igls costums. Ossa è ella an maternitad ed ò betg gist tanta peda. «Nous vagn alloura catto ena donna sen la Surselva tgi è sa declarada pronta. Chegl funcziunga uscheia tgi nous vagn gia en comite d’organisaziun da quatter persungas per l’uniforma. Chel ò er gio tschertas ideias e fò propostas. Egna da chellas ideias era da far ena sort frac. La schnidregna ò alloura ampruo da realisar igls noss giaveischs ed i vagn alla finala preschento dus variantas alla musica ed egna da chellas ò gia la clera favorientscha», ò declaro Guetg. E scu tgi vasagn sen la fotografia dominescha ena calour e chegl è en ferm oransch. La schnidregna fò igl toc digl frac cun capuza e tot. Las tgotschas ò mintgign cumpro sez ed adatto ainten las calours. La calour cotschna detta mecta fitg an îgl, zont schi l’antiera furmaziun seia ansemen. Ma alla fegn ègl tschever!

En retagl tras 20 onns

Igl repertori dalla musica tgi igls fans da tschever vignan a santeir chest onn saro bung 10 tocs. Da chels èn treis u quatter novs. Scu tgi igl dirigent ò detg ins seia er ia a sgultrar en po ainten las notas viglias. Igl muteiv è tgi dalla scuntrada naziunala dallas guggas a Savognin dattigl tranter oter er en concert da giubileum e lò ins less far en retagl tras chels 20 onns passos e piglier er tocs tgi nivan sunos all’antschatta.

Scu funcziunga chegl ansomma cun igls tocs? Responsabel persiva è ena cumischung da musica interna. «I fiss er pussebel da far en tant sezs igls arranschamaints, ma ia va betg la peda tgi dovra persiva. E schi simpel ègl er betg. Nous vagn catto ena bunga adressa noua tgi vign fatg aposta arranschamaints per musica da tschever. Per ca. 100 francs survagninsa lò en toc fitto», dei Guetg.

Chegl tgi pertotga ritmus cun marschar fon igls Fetters Sursetters lour atgnas coreografias tgi èn alloura er ena part digls exercezis tar las provas. Mintg’onn vign er fatg en bloc da show cun igls instrumaints da ritmus, vot deir cun la battareia.

Igl program scu usito

Las activitads digls Fetters Sursetters durant igl onn ins ò pudia liger sen igls flyers tgi èn nias tarmess ainten mintga casal. Chest program sa preschainta ple u manc scu igls onns avant. Gievgia grassa è pir igls 28 da favrer ed igl de siva è Calonda mars. Lez de igl venderde eran tenor tradiziun igls concerts sen plazza e la tura tras las ustareias. «Per betg concurrenzar igls zampugns e lascher ad els chel de la preferientscha nignsa nous chel de activs pir ved seira cun en program restranschia. Per la sagonda geda è lezza seira er ena visita tar Roggi’s Baizli a Tigignas.»

La sonda vers seira vign er fatg ena visita an Val Alvra, numnadamaintg a Barvogn. Chegl ins veva gio fatg igl onn passo e chegl cun grond success. Uscheia è neida puspe la dumonda da turnar. Chegl è la bar da glatsch.

Dad anritgier las seiras da tschever tradiziunalas ainten las vischnancas resta er chest onn cun sonda proxima a Riom e la sonda siva a Salouf.

Egn digls puncts culminonts è naturalmaintg igl til digls unfants sonda proxima a Savognin cun tot igls unfants dalla Val e las uniuns da donnas tgi fon bungs desserts e tranter oter er da chels tipics da tschever scu favetta, paclangas e momas da vegn.

Tar igl giubiluem da 20 onns e las activitads dalla scuntrada naziunala dallas guggas nignsa pi tard.

Suandontamaintg è anc igl urari da posta per igl til digl unfants.

Til da tschever 
pigls unfants

Igls 23 da favrer 2019 allas 13.30. Scu mintg’onn fò la gugga Fetters Sursetters en til da tschever pigls unfants. Er chest onn ò igl til li puspe a Savognin. Igls Fetters Sursetters sa legran d’ena numerousa participaziun da grond e pitschen e da bleras e belas mascras. Las uniuns da donnas preparan ensatge per la seid e fom. En cordial angraztg gio ordavant a tot las donnas per lour stupenta lavour. Igl til antscheva allas 13.30 tar la posta a Savognin.

Urari da posta an 
direcziun Savognin

Parsonz 12.49

Riom 12.52

Salouf 12.59

Cunter 13.06

Savognin 13.10

Return

Savognin 15.08

Cunter 15.19

Riom 15.25

Parsonz 15.29

Salouf 15.39

La posta dallas 15.08 vign scu durant l’emda giun scola pigls unfants.