Ensemble Mondrian el Cinema

(anr/sr) Oz gievgia, ils 21 da fevrer a partir dallas 19.30 concertescha igl Ensemble Mondrian silla tribuna dil Cinema Sil Plaz a Glion. Dapi prest 20 onns fascinescha igl Ensemble Mondrian il publicum cun programs curaschus denter classica e repertori niev. Las quater musicistas engaschadas fan punts denter epocas, stils e spartas da Bach tochen Liszt e Feldman e confruntan adina puspei il publicum cun cumbinaziuns novas e surprendentas. Cun la rihezia d’ideas ed aulta qualitad ha igl ensemble anflau in plaz singular ella scena svizra. Igl Uffeci federal da cultura ha undrau igl Ensemble Mondrian cul Premi svizzer da musica 2018.

No Reality

El center dil concert «No Reality» stattan «tuns da crap». Ei vegn fatg tunar la crappa entras rebattidas mecanicas. En «No Reality» vegn igl Ensemble Mondrian a presentar entginas da quellas ovras e cruschar quellas cun cumposiziuns dad Edu Haubensak. La finfinala vegnan ils munds da tuns microtonals da Haubensak ed ils tuns da crap uni ella cumposiziun «No Reality» – in’ovra per quartet al clavazin, lithophon (instrument da crap) e tschinellas da Haubensak. Sco percussiunista ei la Svedesa Erika Öhmann hosp digl ensemble. Tier igl Ensemble Mondrian s’audan las musicistas Ivana Pristašová alla violina, Petra Ackermann alla viola, Karolina Öhman al violoncello e Tamriko Kordzaia al clavazin.