Visita da l’ambassadura 
da l’Aserbeidschan

(cc) L’ambassadura da l’Aserbeidschan, Hanum Ibrahimova, ha visità ier – sin invitaziun da la regenza – il chantun Grischun. L’ambassadura da la republica da l’Aserbeidschan Hanum Ibrahimova è vegnida beneventada ier en la chasa grischa a Cuira dal president da la regenza Jon Domenic Parolini e dal chancelier Daniel Spadin. L’ambassadura è vegnida accumpagnada da l’emprim secretari da l’ambassada, Elman Muradov. Suenter il barat dals salids uffizials è stà in gentar cuminaivel sin il program. La regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais ch’han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.