Sfida per politichers e possessurs

Da Hans Huonder / anr

Clavaus vegls ein ina part dil maletg e dalla cultura d’in vitg. La damonda, a tgei intent ch’els duein survir egl avegnir, sa buca vegnir rispundida en in collectiv. Tonaton ei ina visiun necessaria. La mesjamna sera han quater persunas engaschadas ella politica, l’architectura e la cultura discussiunau a Mustér davart il «nuegl el vitg». El center ei la damonda tgei far cun clavaus vits enteifer la zona da baghegiar stada. In recept ha negin furniu, il cuntrari. Ils meinis davart il nez futur van in ord l’auter. Ferton ch’igl architect Gion A. Caminada appellescha en quei connex en favur d’ina clara strategia pigl entir vitg plaida il cusseglier naziunal Martin Candinas claramein per in agir liberal. Leschas ed ordinaziuns stoppien vegnir nezegiadas aschi fetg sco pusseivel en favur dils possessurs ni cumpraders da tals baghetgs. Iso Mazzetta che sefatschenta il mument ella vischnaunca da Mustér dalla planisaziun locala ei perschuadius ch’ei sto dar pusseivladads prudentas che lubeschan era veta els vitgs ed igl intendant Giovanni Netzer ha provocau empauet: «Ins sa gie era scarpar giu in vitg e baghegiar si el da niev en in auter liug.» La reutilisaziun da clavaus en zona da baghegiar vegn a fatschentar ils politichers locals e possessurs dils baghetgs ils proxims onns.

commentari e Pagina 3