Emprender co emprender

(anr/abc) Giuvnas e giuvens ch’absolvan il davos onn da lur emprendissadi vegnan plaunsiu nervus. En dus meins han els da sepresentar avon ils experts. Nov emprendists dalla Repower ein sepreparai duront dus gis a Siat pils examens finals. Saver co emprender sa esser d’engrau. Ina buna preparaziun sils examens finals sa gidar e sustener. Quell’experientscha han siat giuvens collaboraturs e duas giuvnas collaboraturas dalla Repower fatg gliendisgis e margis a Siat. Nov dils 30 emprendists dall’interpresa ston seconcentrar ils proxims meins sigl emprender. La fin da matg e l’entschatta zercladur ston els sepresentar avon ils experts. Quels examineschan lur habilitads a bucca ed a scret. Cun in examen vegnan ins exposts definitivamein. Ins ei malsegirs, sa buca tgei che spetga e co reagir. Igl examen final ei in pass decisiv ella carriera professiunala da mintgina e mintgin. La nota finala ed il diplom ein schenghetgs ch’ins sto pilver gudignar. Emprendists fan quei culs examens teoretics e pratics. La Repower porscha a ses emprendists mintg’onn in cuors nua ch’els emprendan d’emprender.

Dumignar la malsegirtad

Ils nov giuvenils ch’han d’absolver uonn ils examens finals a Cuera han actualmein ina finamira: contonscher il diplom federal. Per saver entrar ella veta professiunala ston els mussar lur attestat d’habilitad. A Siat ella Sentupada han futurs electricists da reit, polimecanists, automatichers e commerciantas giu caschun da sepreparar sils examens. Rahel Bauer, responsabla tier Repower pils emprendists, ha organisau il program dalla dimora ell’anteriura casa da scola. Ensemen cun Tarcisi Cavigelli ed ulteriurs instructurs els divers secturs dall’interpresa ha ella dau peisa ad ina preparaziun optimala. Duront il cuors da dus gis han ils emprendists denter auter absolviu ina simulaziun.

Avon che far in examen «tschiec» han els survegniu instrucziun speciala e cussegls. Ils giuvenils ein s’approfundai en strategias d’emprender. La psicologa Stefanie Birrer ha mussau da memorisar, co ei va pli tgunsch d’emprender e co ins damogna meglier la tema. Denter auter ha ella rendiu attent che buca mo ils candidats han savens da batter cun nervusadad, mobein era experts ch’ein preoccupai ch’ei gartegi. In dils sempels cussegls pratics che la psicologa ha dau ei quel da restar sesez. «Seigies autentics. Buca mei per exempel als examens en mondura e cravatta», ha ella getg als emprendists.

Restar autentics

Duront in auter luvratori han els saviu scolar lur cumpetenzas socialas e metodicas. El center dil cuors ei la simulaziun d’in examen teoretic a scret stada. Quei mintgamai en cumbinaziun cun discuors e valetaziuns. Ils futurs electricists da reit ston esser buns quintaders. In bien fundament en matematica e fisica ei era la basa dil success pils polimecanists ed automatichers. Las emprendistas da biro ston saver dumignar l’informatica, lungatgs, tecnica da communicaziun. Ils dus gis concentrai dils examens tschocs ella Sentupada a Siat ein i a fin cun in luvratori. Bauer ha mussau als emprendists tecnicas da presentaziun. Era han els retschiert in’introducziun ella procedura impurtonta che suonda sch’ins ha terminau cun success ils examens. Tgi che sto s’annunziar per ina plazza sto numnadamein era risguardar certas formalitads. En quella fasa, naven dil scriver l’annunzia tochen tier il discuors persunal, ston ins esser autentics e restar sesez. Sco quei che l’anr ha saviu seperschuader duront ina viseta tiels giuvenils han quels appreziau grondamein cussegls e sustegn da persunas cumpetentas.