Nagina remischun cun padraster pedofil

Da Claudia Cadruvi / ANR

In padraster violescha repetidamain la figlia da sia dunna cura che la mattatscha ha diesch ed indesch onns. Il Tribunal federal refusa uss ses recurs e conferma la sentenzia da nov onns praschun da la Dretgira chantunala grischuna. Lezza aveva giuditgà il cas avant in onn. En ina sentenzia da passa ventg paginas descrivan ils derschaders grischuns co che l’um, naschì il 1986, crescha si en in ambient puril e co ch’el banduna ses dachasa per fugir sur la mar mediterrana. Sco giuvenil chatta el l’emprim dimora en ina champ da fugitivs en l’Italia e vegn suenter en Svizranua ch’el tschenta ina dumonda d’asil sut in auter num e cun inditgar il 1994 sco onn da naschientscha. El vegn en ina chasa per requirents en il Grischun.

Bacterium sco cumprova

Qua emprenda el d’enconuscher ina dunna ch’ha gia duas figlias or d’in’autra relaziun. A partir dal 2013 abitescha el ensemen cun ella ed els survegnan anc duas atgnas figlias. Cura ch’el dumonda las scrittiras necessarias per maridar inditgescha el ses vair num e ses vair onn da naschientscha. Perquai ch’el ha cugliunà repetidamain las autoritads survegn el in chasti cundiziunà dad 80 schurnadas à 30 francs. Avant trais onns avisescha la Kesb la Procura publica ch’ins suspecteschia l’um dad acts sexuals cun persunas minorennas. Il spital chantunal interquera la figliastra veglia e chatta en sia vagina il bacterium ureaplasma parvum ch’ins po survegnir sulet entras contact sexual. Tar la figliastra giuvna na chattan ins naginas da questas bacterias.

En las interrogaziuns entras ina policista descriva la mattatscha co che l’um l’ha penetrada anal las emprimas giadas e pli tard era violà vaginal. Quai è succedì durant dus onns cura che la mattatscha aveva enturn diesch ed indesch onns. L’um ha mintgamai smanatschà ch’i capitia insatge nausch sch’ella ditgia insatge.

Um pretenda da n’avair fatg nagut

La Dretgira regiunala sentenziescha l’um a 12 onns praschun pervi da violaziun ed acts sexuals cun in uffant e perquai ch’el ha dà fridas ad omaduas figliastras. Plinavant scroda ses chasti cundiziunà ch’el sto uss ademplir. L’um fa recurs e la Dretgira chantunala grischuna che sminuescha il chasti sin nov onns praschun. Avant tuttas instanzas repeta l’um adina puspè ch’el saja senza culpa, ch’el haja gugent sia dunna e ses uffants e ch’el na tutgass mai en sias figliastras. La Dretgira chantunala scriva perquai era che la difficultad da l’accusa saja ch’ella sa basia essenzialmain sin las indicaziuns d’ina mattatscha ch’aveva diesch fin indesch onns cura ch’igl è capità. Dus examinaturs analiseschan perquai aposta sche la mattatscha è insumma capabla da far las indicaziuns necessarias e sche quellas èn verdaivlas. Els attesteschan che las descripziuns da la mattatscha èn logicas, consistentas e cuntegnan blers detagls.

Plinavant correspundan las indicaziuns da la mattatscha visavi la policista era a quai ch’ella ha raschunà a sia onda ch’è stada l’emprima persuna a la quala ella ha ristgà da sa confidar. Per la Dretgira chantunala èsi cumprovà che l’um ha violà sia figliastra. La dretgira reducescha il chasti dentant sin nov onns praschun perquai che l’um – era sch’ils schabetgs èn stads traumatics per la mattatscha ed el ha nizzegià or sia posiziun sco padraster – n’ha betg agì a moda fitg brutala e n’ha betg fatg diever da forza fisica.

Losanna fa curtas

Malgrà la reducziun dal chasti recurra l’um anc a Losanna. Il Tribunal federal fa curtas en sia sentenzia da strusch trais paginas e scriva che la preinstanza haja constatà ils fatgs cun tut quità considerand tant ils mussaments distgargiants sco er accusants.

Sentenzia 6B_1175/2018 dals 28 da schaner 2019, publitgada ils 12 da favrer 2019