Semover ella natira intacta ei tschercau

Dad Andreas Cadonau / ANR

Far turas ei cumplet «in». Igl interess viers cuors d’introducziun dallas scolas alpinas ch’intermedieschan ils misteris da semover cun skis egl intschess alpin ordvart dallas pistas marcadas anflan in cuntinuau resun. In trend che sefa valer en valladas giudvart dallas grondas undas turisticas sco la Stussavgia. Il prospect dall’organisaziun turistica dalla Stussavgia empermetta als adherents dallas turas da skis in gudiment en spundas da neiv intactas. Biaras spundas intactas ein momentan denton buca da veser ellas spundas drizzadas viers sid dalla Val Stussavgia. Ils fastitgs dils skis ella neiv tradeschan in’aulta activitad da turas el decuors dallas jamnas vargadas ellas spundas da Safien-Platz entochen Thalkirch. Nina Buchli ei momentan responsabla per la lavur turistica ella Val ed ha menziunau la munconza da precipitaziuns. Ina pintga cozza da neiv nova e las spundas sepresentien puspei en in maletg intact. Buchli ha denton concediu che las activitads sportivas dils adherents da turas da skis e gianellas seigien s’augmentadas considerabel el decuors dils onns vargai. Ils paucs menaschis turistics che porschan albiert en Val Stussavgia profiteschan da quei trend. Ei dat secapescha biars adherents da turas da skis e da gianellas che serendan la damaun ella Val e bandunan la sera la Val senza haver contribuiu alla plivalur dall’economia indigena. Buchli ei cunscienta da quei fatg, fa denton era attent alla munconza da menaschis gastronomics en la Val Stussavgia, aschia che biars sportists promts da far in paus e prender in puschegn anflien strusch in’occasiun. Dallas activitads sportivas tradeschan era ils autos parcai per liung dalla via principala ed els access als numerus uclauns. Gest duront fins dall’jamna da bialaura ein las paucas occasiuns da parcar occupadas ed igl auto da posta ha magari fadigia da tschercar sia via. Per la responsabla dall’uniun turistica munta il traffic turistic bein ina sfida futura per la Stussavgia, tonpli duront unviarns cun biara neiv.

Liug giudvart

Il president communal dalla vischnaunca Stussavgia, Thomas Buchli, ei satisfatgs che la Val anfla in resun turistic sco liug giudvart dils gronds centers. E ch’ei seigi reussiu da posiziunar la vischnaunca en in segment individual cun turas, viandar, cuorsa liuga e cun il runal solar da Tenna. Che la Stussavgia anfla ton resun tiels adherents da turas e gianellas attribuescha il president communal al territori adattaus per persunas cun pintga experienza da turas e cun plauncas meins exponidas al prighel da lavinas. El ha tschintschau da dus segments da hosps, ina part che vegni da pli lunsch neutier e passenti in pèr gis da vacanzas ella Val per far turas. Gest duront las fins dall’jamna vegnien era biars hosps dil gi per far ina tura. Il problem dil traffic respectiv da parcar vul il president buca survaletar. El demuossa certa capientscha per il skiturs che vulan schar lur auto sper via per ascender il cuolm. Thomas Buchli ei cunscients ch’igl emprem cuors dad auto da posta en Stussavgia ei memia tard sin via ella Val per biars skiturs da turas. Gest da bialaura cun aultas temperaturas vulan els esser pli baul els aults. Il president communal ha menziunau il menaschi d’emprova cun il bus da turas da Versomi entochen Brün en funcziun per l’emprema ga duront igl unviern. En quella direcziun vesa Thomas Buchli aunc dabia potenzial per adattar la purschida dil traffic public.

Grond interess da giuven e vegl

Il guid da muntogna Paulin Cathomas e sia scola alpina Tödi domiciliada dapi entgin temps a Breil senta in grond interess per sia purschida da turas. Gest ils cuors ch’intermedieschan ils emprems pass ordeifer la pista cun equipament da tura ein fetg tschercai. E sco il guid da muntogna ha tradiu da tuttas vegliadetgnas e schlatteinas. Cathomas porscha era turas en Val Stussavgia e quellas seigien fetg appreziadas, sco el ha menziunau. Pervia dallas spundas bein situadas, buca memia exponidas e per regla curcladas cun ina buna cozza da neiv. Il guid da muntogna da Breil attribuescha alla Val Stussavgia da posseder ina certa attractivitad perquei ch’ella vali per empau solitaria ed aschia exclusiva. Cathomas fa stem ch’il carstgaun quotidian tscherca moviment ella natira e quei da cuminonza. El valetescha il carstgaun modern per empau solitaris. Ed il guid ha puntuau che buca sulet las valladas indigenas seigien tschercadas da sia clientella. Era turas ell’America dil sid ein beinfrequentadas. «Il hosp modern vul era ir el lontan, ad ault e buca memia exponiu e riscau.»