Ils adversaris ein s’organisai

Da Hans Huonder / anr

L’Uniun dils catschadurs da patenta dil Grischun, l’Uniun dils purs grischuns e l’organisaziun forestala Selva han fundau communablamein in comite encunter l’iniziativa d’abolir la catscha speciala. Igl ei previu differentas activitads. Cun in flyer ellas gasettas dallas treis organisaziuns vegnan ils commembers sensibilisai per la votaziun ch’ha liug ils 19 da matg 2019. Medemamein ha il comite scaffiu ina pagina d’internet cun biars detagls davart il cumbat da quell’iniziativa dil pievel. Alla radunonza dils presidents dallas secziuns dils catschadurs la sonda ei vegniu orientau davart la campagna. Sco quei ch’il president dall’Uniun cantunala dils catschadurs, Robert Brunold, ha detg sin damonda dall’Agentura da novitads rumantscha vegn la campagna encunter quell’iniziativa a custar rodund 150 000 francs. Ils catschadurs persuls mettan a disposiziun persuenter 70 000 francs. «Nus sperein che nus survegnien aunc enqual donaziun, aschia ch’ils cuosts duessen esser pli bass per las treis organisaziuns», di Brunold. L’iniziativa ei vegnida tractada dil cussegl grond il december passau suenter che la Dertgira federala haveva decidiu ch’ella stoppi vegnir suttamessa al pievel. Il parlament cantunal recamonda da refusar ella.

Commentari e pagina 3